अखबार नेपाल ट्रेन्डिङ

काठमाडौं: नेपाल आयल निगमले पेट्रोलियम पदार्थको मूल्य वृद्धि गरेको छ । अन्तर्राष्ट्रिय बजारमा मूल्य बढेर आएको र इन्डियन आयल कर्पोरेसन (आईओसी) लाई तिर्नुपर्ने बक्यौता रकम बढ्दै गएको भन्दै निगमले आइतबार राति १२ बजेदेखि लागू हुने गरी इन्धनको मूल्य बढाएको हो ।

निगमले सार्वजनिक गरेको नयाँ मूल्यसूची अनुसार पेट्रोलमा प्रतिलिटर १५ रुपैयाँ तथा डिजेल र मट्टितेलमा प्रतिलिटर १० रुपैयाँका दरले वृद्धि गरिएको छ। निगमले डिपो स्थल र भौगोलिक क्षेत्रलाई तीन वर्गमा विभाजन गरी फरक–फरक खुद्रा बिक्री मूल्य तोकेको छ । काठमाडौं, पोखरा र दिपायल पर्ने तेस्रो वर्गमा अब पेट्रोलको खुद्रा बिक्री मूल्य प्रतिलिटर १७२ रुपैयाँ र डिजेल तथा मट्टितेलको १५२ रुपैयाँ पुगेको छ ।

त्यसैगरी, सुर्खेत र दाङ पर्ने दोस्रो वर्गमा पेट्रोलको १७१ रुपैयाँ र डिजेलको १५१ रुपैयाँ कायम भएको छ । चारआली, विराटनगर, जनकपुर, अमलेखगञ्ज, भलवारी, नेपालगञ्ज, धनगढी र वीरगञ्ज पर्ने पहिलो वर्गमा भने पेट्रोल १६९ रुपैयाँ ५० पैसा र डिजेल १४९ रुपैयाँ ५० पैसामा बिक्री हुनेछ । बढेर आएको मूल्य समायोजन नगर्दा आईओसीलाई भुक्तानी गर्न नसकिने र त्यसले देशको समग्र इन्धन आपूर्ति प्रणाली नै अवरुद्ध हुने जोखिम देखिएपछि बाध्यतावश यो निर्णय लिनुपरेको निगमले प्रस्ट पारेको छ ।

सार्वजनिक सवारी र ढुवानीका साधनमा प्रयोग हुने डिजेलको मूल्य अत्यधिक बढाउँदा सर्वसाधारण र उपभोग्य वस्तुको बजारमा गम्भीर असर पर्ने भएकाले अधिकतम लचकता अपनाएर डिजेलमा कम मूल्य वृद्धि गरिएको निगमको भनाइ छ । अन्तर्राष्ट्रिय बजारमा भएको मूल्य वृद्धिको सम्पूर्ण भार उपभोक्तामाथि मात्र नथोपरि केही रकम ‘मूल्य स्थिरीकरण कोष’बाट समेत व्यवस्थापन गरिएको छ । यद्यपि, यति ठूलो मात्रामा मूल्य वृद्धि गर्दा समेत निगमलाई पाक्षिक (१५ दिनमा) करिब ३ अर्ब ९३ करोड रुपैयाँ घाटा हुने प्रक्षेपण विज्ञप्तिमा उल्लेख छ ।

हालको विषम परिस्थितिका कारण बाध्य भएर मूल्य बढाउनुपरेको भन्दै निगमले यसबाट उपभोक्तामा पर्न जाने असुविधाप्रति आफू गम्भीर र सचेत रहेको जनाएको छ । साथै, अन्तर्राष्ट्रिय बजारमा मूल्य घट्नासाथ तत्काल नेपालमा पनि मूल्य घटाउने प्रतिबद्धता व्यक्त गर्दै निगमले यस चुनौतीपूर्ण अवस्थामा सबै उपभोक्ता तथा सरोकारवालाहरूसँग सहयोगको अपेक्षा गरेको छ ।