अखबार नेपाल ट्रेन्डिङ

काठमाडौं: २०७२ सालबाट रक्षा मन्त्रालय र नेपाली सेनाको सहकार्यमा शिवपुरीस्थित सैनिक कमाण्ड तथा स्टाफ कलेजमा सञ्चालन हुँदै आएको उच्चस्तरीय राष्ट्रिय सुरक्षा तालिमको ११ औं संस्करण चैत १ गतेबाट शुरु भएको छ । प्रधानसेनापति अशोकराज सिग्देलले उक्त तालिमको समुदघाटन गरेका हुन् । यस किसिमको उच्चस्तरीय तालिमले राष्ट्रिय सुरक्षाका सम्बन्धमा साझा बुझाई एवम् धारणाको विकास गर्नुका साथै राज्यका संयन्त्रहरुबीच एकता कायम गर्न टेवा पुर्याएको अनुभव विगतका तालिमहरुबाट गरिएको छ र नेपाली सेनाले पनि यही विश्वासका साथ यस किसिमका तालिमहरु सञ्चालन गर्दै आएको छ ।

११ औं संस्करणको उच्चस्तरीय राष्ट्रिय सुरक्षा तालिम समुदघाटन समारोहमा रक्षा सचिव केदारनाथ शर्माले उच्चस्तरीय राष्ट्रिय सुरक्षा तालिमको महत्त्व र आवश्यकताबारे प्रकाश पारेका थिए । चैत्र १८ गतेसम्म सञ्चालन हुने तालिममा विभिन्न मन्त्रालय, संवैधानिक निकाय, विश्वविद्यालय, सञ्चार जगत, नेपाली सेना, नेपाल प्रहरी, सशस्त्र प्रहरी बल, नेपाल एवं राष्ट्रिय अनुसन्धान विभागबाट ३० जनाको सहभागिता रहेको छ । १० औं संस्करणसम्म उच्चस्तरीय राष्ट्रिय सुरक्षा तालिमबाट २ सय ५२ जना प्रशिक्षित भइसकेका बताइएको छ ।

नेपाली सेनाले ‘बलियो एकता, सुरक्षित राष्ट्र’ को अवधारणाअनुसार उच्चस्तरीय राष्ट्रिय सुरक्षा तालिममा विभिन्न मन्त्रालय, संवैधानिक निकाय, सञ्चार माध्यम, नेपाल प्रहरी, सशस्त्र प्रहरी बल, नेपाल एवम् राष्ट्रिय अनुसन्धान विभागलगायतका प्रतिनिधिहरुलाई सहभागी गराउँदै आएको छ ।