अखबार नेपाल ट्रेन्डिङ

काठमाडौं: बिहीबार सम्पन्न प्रतिनिधिसभा सदस्य निर्वाचनको मतगणना जारी छ । मतगणना जारी रहेका ५० भन्दा बढी निर्वाचन क्षेत्रमा राष्ट्रिय स्वतन्त्र पार्टी (रास्वपा)का उम्मेदवारहरुले फराकिलो अग्रता बनाइरहेका छन् भने कांग्रेस, एमाले र नेकपा लगायत दलका उम्मेदवार मतगणनामा धेरै पछाडि छन् ।

मतदाताको यो रुझान अन्तिमसम्म अन्य क्षेत्रमा पनि कायमै रहे रास्वपाले बहुमत ल्याउने संकेत देखिएको छ । प्रारम्भिक मतगणनामा आएको परिणामबारे कांग्रेस, एमाले र नेकपाका नेताहरु जनअभिमतबाट प्रकट भएको परिणाम स्वीकार्ने जनाएका छन् । एमाले नेता तथा निर्वाचन प्रचार संयोजक मीनबहादुर शाहीले लोकतान्त्रिक अभ्यास र विधिबाट आएको परिणाम स्वीकार्दै आगामी दिनमा रणनीति बनाउदै अघि बढ्ने बताएका छन् ।

त्यस्तै नेकपाका नेता देव गुरुङले प्रायोजित रणनीति अनुसार गरिएको निर्वाचनमा यस्तो परिणाम आउनु स्वाभाविक भएको बताएका छन् ।  कांग्रेस उपसभापति विश्वप्रकाश शर्माले प्रतिनिधिसभा निर्वाचनमा मतदाताको फैसला स्वीकार्य भएको प्रक्रिया दिएका छन् ।