अखबार नेपाल ट्रेन्डिङ

काठमाडौं: संविधान दिवसको अवसरमा दरबारमार्गमा बिहीबार ‘नेसनल डे कन्सर्ट’ गरिँदै छ । बृहत् नागरिक आयोजक समितिको नामबाट ‘नेसनल डे कन्सर्ट’ आयोजना गर्न लागेको हो । बुधबारदेखि नै सवारी आवागमन ठप्प पारेर कन्सर्टको तयारी गरिएको हो ।

दिउँसो ४ बजे हुने कन्सर्ट नागरिकस्तरबाट आयोजना गरिएको बताइएको छ । सरकारले दूरसञ्चार सेवा प्रदायकमार्फत सन्देश नै पठाएर सहभागी हुन आह्वान गरेको छ ।  कन्सर्टमा कुन्ती मोक्तान, देविका बन्दना, सुगम पोखरेल, दीपक लिम्बु, आनन्द कार्की, स्वप्न सुमन लगायतका गायकगायिकाहरुले गीत गाउनेछन् । त्यसैगरी, चर्चित ब्यान्डहरु कुटुम्ब र एलिमेन्ट्सको समेत प्रस्तुति रहने बताइएको छ । कन्सर्टले लोकतान्त्रिक यात्रा र संविधान निर्माणको ऐतिहासिक बलिदानलाई सम्झाउने आयोजकले जनाएको छ ।

राष्ट्रिय र अन्तर्राष्ट्रिय स्तरमा नेपालको पहिचानलाई प्रवर्द्धन गर्न, युवापुस्तामा एकताको भावना जोगाउन र नागरिक संलग्नता बढाउन सहयोग पुर्‍याउने विश्वास छ । देशको सांस्कृतिक सम्पदा, उपलब्धि र राष्ट्रको प्रतिभालाई उजागर गर्ने विश्वास लिइएको छ ।