अखबार नेपाल ट्रेन्डिङ

विराटनगर: ग्याङ फाइट गर्न भन्दै हिँडेका युवाको समूहलाई मोरङ प्रहरीले पक्राउ गरेको छ । विराटनगर-९ घोघापुल चोकबाट उनीहरुलाई  पक्राउ गरेको प्रहरीले जनाएको छ । १५ जनाको समूहलाई मोरङ प्रहरीले आज दिउँसो तरबारसहित पक्राउ गरेको जिल्ला प्रहरी कार्यालय मोरङका प्रवक्ता डिएसपी रञ्जन दाहालले जानकारी दिए ।

उनका अनुसार  ग्याङ फाइट गर्न हिँडेको सूचना प्राप्त भएपछि तत्कालै घटनास्थलमा टोली खटाएकाले ठूलो घटना टरेको हो । युवतीको विषयलाई लिएर  ग्याङ फाइट गर्न हिँडेको प्रहरीले जनाएको छ । पक्राउ पर्ने मोरङ र सुनसरीका रहेको प्रहरीले जनाएको छ । पक्राउ पर्नेमा  कटहरी ४ का १८ वर्षीय शेषकवि अलि, सुनसरी बर्जू गाउँपालिकाको विजय चौधरी, सोही ठाउँका राहुल दास र १९ वर्षीय ललनकुमार मेहतासहित १५ जना रहेका छन् ।

पक्राउ परेका अन्य १२ जना नाबालक रहेकोले प्रहरीले अन्यको नाम गोप्य राखेको छ । पक्राउ परेका अलिको साथबाट प्रहरीले तरवाल फेला पारेको छ भने, उनीहरूको साथबाट प्रहरीले खुँडा, लाडी र नखल लगायतका हातहतियार बरामद गरेको छ । पक्राउ परेका अलिको समूह विराटनगरको घोगा पुल चोकमा जम्मा भएर दुई वटा सिटीमा ग्याङ फाइट गर्ने उद्देश्यले शान्ति चोक जान भनेर हिँडेका थिए ।