अखबार नेपाल ट्रेन्डिङ

काठमाडौं: काठमाडौं महानगरपालिकाका मेयर बालेन्द्र शाहलाई धरान उपमहानगरका मेयर हर्क साम्पाङले मुद्दा लाग्दा नडराउन सुझाव दिएका छन् ।

काठमाडौं महानगरका हलमा हिन्दी फिल्म प्रदर्शनमा रोक लगाएपछि हलवालाहरूले बालेन्द्रविरुद्ध मुद्दा हालेका थिए । जस अन्तर्गत आइतबार मात्र सर्वोच्च अदालतले उनलाई तारेख दिएको छ ।

आइतबार सामाजिक सञ्जालमा तारेख पर्चा सार्वजनिक गर्दै मेयर बालेन्द्रले भारतको सांस्कृतिक हस्तक्षेपको विरोध गर्दा आफूलाई ‘अपराधी’ बनाइएको भन्दै गुनासो गरेका थिए ।

सोही सन्दर्भमा धरानका मेयर हर्कले त्यस्ता मुद्दा त आफूलाई धेरैवटा लागेको उल्लेख गर्दै नहच्किन बालेन्द्रलाई आग्रह गरेका छन् ।

‘बालेन मेयर साप, मुद्दा लाग्दा हच्किनुहुन्न । त्यस्ता जाबो मुद्दा त हप्तामा २/३ वटा लाइरन्छ मलाई त’, हर्कले सोमबार बिहान सामाजिक सञ्जाल मार्फत भनेका छन्, ‘ढोइट.. भन्दै अघि बढ्नुपर्छ । ढोइट…।’ शाह र साम्पाङ दुवै स्वतन्त्र उम्मेदवारीबाट निर्वाचित मेयर हुन् ।