रेशम चौधरीको रिहाइ माग गर्दै माइतीघर मण्डलामा धर्ना
वि.सं.२०७९ पुस ६ बुधवार १७:१६
काठमाडौं: नागरिक उन्मुक्ति पार्टीका निर्वाचित सांसदहरूले रेशम चौधरीको रिहाइ माग गर्दै प्रतिनिधिसभा र प्रदेशसभाका १६ जना सांसदहरू माइतीघर मण्डलामा धर्ना बसेका छन् ।
उनीहरूले रेशम चौधरीसहित निर्दोष थारूहरूको रिहाइ हुनुपर्ने, लाल आयोगको प्रतिवेदन सार्वजनिक गर्नुपर्ने र सरकारले ल्याएको अध्यादेश प्रमाणीकरण हुनुपर्ने प्लेकार्डसहित धर्नामा बसेका हुन् ।
नागरिक उन्मुक्ति पार्टीकी अध्यक्ष रञ्जिता श्रेष्ठ चौधरीले रेशम चौधरीसहित टीकापुर घटनाका राजबन्दीहरूको रिहाइ नभएसम्म धर्ना जारी राख्ने बताइन् । उनले माइतीघरमा नवौं दिन र देशभरि नै थारूहरू स्वतस्फुर्तरूपमा धर्ना बसिरहेका बताइन् ।
उनले निर्दोष थारूहरूलाई झुठा मुद्दा लगाएर राजबन्दी बनाइएको भन्दै उनीहरूको यथाशिघ्र रिहाइ हुनुपर्ने बताइन् । त्यस्तै रेशम चौधरीका बुबा लालविर चौधरीले न्यायका लागि धर्नामा बसेको बताए ।
त्यस्तै प्रतिनिधिसभा सांसद गंगा चौधरीले राष्ट्रपति विद्यादेवी भण्डारीलाई अध्यादेश प्रमाणीकरण गर्न आग्रह गरे । उनले अध्यादेश मार्फत् निर्दोष थारूहरूले न्याउने पाउने भन्दै अध्यादेश प्रमाणीकरण गर्न आग्रह गरेका हुन् ।
वि.सं.२०७९ पुस ६ बुधवार १७:१६