अखबार नेपाल ट्रेन्डिङ

काठमाडौं: काठमाडौं महानगरपालिकाले मन्दिर तथा सम्पदा क्षेत्रमा अवैध रूपमा सञ्चालन भइरहेको पसल हटाउने भएको छ ।

यही क्रममा काठमाडौं महानगरपालिकाको २५ नम्बर वडा कार्यालयले असन, इन्द्रचोक क्षेत्रमा मन्दिर र तथा सम्पदा अतिक्रमित गरी सञ्चालन भइरहेका पसल हटाउने अभियान थालेको छ ।

वडा कार्यालयले २४ घन्टे अल्टिमेटम दिँदै मन्दिर तथा सम्पदा क्षेत्रमा अवैध रूपमा सञ्चालन भइरहेका पसल हटाउन सूचित गरेको छ ।

इन्द्रचोकस्थित सन्तानेश्वर महादेव मन्दिरवरिपरिको खास्तो व्यापार, भेडासिंहस्थित श्री भवानी शंकर मन्दिर क्षेत्रमा नौदेबल (माटोको भाँडाकुँडा)का पसललगायत अन्य व्यापार व्यवसाय हटाउन वडा कार्यालयले अल्टिमेटम दिइएको छ ।

मापदण्डविपरीत अनधिकृत रूपमा राखिएका डिजिटल होर्डिङ बोर्ड हटाइरहेको महानगरले सम्पदा तथा मन्दिर क्षेत्र ओगटेर सञ्चालन भइरहेका पसल हटाउन लागेको महानगरले जनाएको छ ।

गैरकानुनी संरचना भत्काउने अभियानमा मेयर बालेन्द्र साहलाई काठमाडौं महानगरवासीको व्यापक जनसमर्थन मिलेपछि अनधिकृत रूपमा राखिएका डिजिटल होर्डिङ बोर्ड हटाउन सुरु गरेको छ ।

उनको अभियानलाई साथ दिँदै महानगरका वडा कार्यालयहरूले पनि आ-आफ्ना क्षेत्रमा रहेका अनधिकृत संरचना र पसल हटाउन सुरु गरेका छन् ।