अखबार नेपाल ट्रेन्डिङ

काठमाडौं: नेकपा एकीकृत समाजावादीका अध्यक्ष माधवकुमार नेपालले गठबन्धनको बलमा चुनाव जित्ने सोचाइ त्याग्न सुझाव दिएका छन् ।

सम्पादकहरुसँग छलफलका क्रममा नेता नेपालले आफ्नै खुट्टामा उभिएर चुनाव जित्ने गरी तयारी गर्न कार्यकर्तालाई निर्देशन दिएका हुन् ।

‘गठबन्धन-गठबन्धनको गीत गाउन बन्द गर्नुस् । आफ्नो खुट्टामा उभिनुस्’ नेपालले भने, ‘संगठन निर्माणमा जोड दिनुस् । एक्लै चुनाव जित्ने गरी तयारी गर्नुस् ।’

नेता नेपालले अहिलेको स्थानीय चुनावमा भन्दा आगामी संघीय र प्रदेशको चुनावमा राम्रो मत ल्याउन दाबी पनि गरे । उनले आफ्नो संगठन कमजोर नरहेको बताए ।

सबै ठाउँमा कमिटी बनाउन नसकेको, ७० प्रतिशतको सेरोफेरोमा मात्रै कमिटी बनेको, सबै ठाउँमा उम्मेदवार बनाउन सक्ने अवस्था रहेपनि उम्मेदवार उठाउन नसकिएको अवस्थामासमेत स्थानीय चुनावमा ल्याएको मतपरिणाम उत्सहजनक रहेको उनले बताए ।

गठबन्धनकै कारण पोखरा महागर र हेटौँडा उपमहानगर जित्न सफल भएको उनले बताए ।

मतपत्र बदर नभएको भए काठमाडौं महानगर, तुलसीपुर र इटहरी उपमहानगरको उपमेयर जित्न सक्ने अवस्था रहे पनि उनले बताए ।

नेता नेपालले अहिले मतपत्र बदर भएको अवस्थालाई ध्यान दिँदै आगामी निर्वाचनमा उठेका उम्मेदवारहरु मात्रै भएको चिह्न राख्ने, प्रमुख उपप्रमुख र वडाको छुट्टाछुट्टै मतपत्र बनाउन सुझाव पनि दिए ।