अखबार नेपाल ट्रेन्डिङ

कास्की: पोखरा प्रिमियर लिग पीपीएल टी-ट्वान्टी क्रिकेट प्रतियोगिताको दोस्रो संकरणको उपाधि भिडन्त आज पोखरा क्रिकेट मैदानमा हुँदैछ । फाइनलमा अपराजित चितवन राइनोज र लयमा फर्केको विराटनगर टाइटन्स भिड्दैछन् ।

पहिलो संस्करणको उपविजेता चितवन यसपटक उपाधि जित्ने लक्ष्यका साथ मैदानमा उत्रँदै छ भने लिग चरणको खेलमा अंक तालिकामा तेस्रो रहेको विराटनगरले दोस्रो स्थानमा रहेको बुटवल ब्लास्टर्सलाई एलिमिनेटर खेलमा २१ रनले पराजित गर्दै फाइनल पक्का गरेको हो । विराटनगरका युवा खेलाडी लयमा फर्केका छन् भने पारस खड्काका कप्तानीमा रहेको चितवन प्रतियोगिताका लिग चरणका ५ वटै खेल जित्दै सोझै फाइनलमा पुगेको छ ।

पोखरा रंगशालाको क्रिकेट मैदानमा आज फाइनल भिडन्त पक्का गरेका दुई टिमका कप्तानसँग भएको प्री म्याच कन्फ्रेन्समा चितवनका कप्तान पारसले अपराजित यात्रालाई जारी नै राख्ने गरि मैदानमा उत्रने बताए । त्यस्तै, विराटनगरका कप्तान प्रदिपले ओपनेन राम्रो टिम भएकोले त्यसैअनुसार आफूहरु मैदानमा उत्रने बताए । प्रदिपको कप्तानीमा रहेको विराटनगरमा टिममा सुनिल धमला, जितेन्द्र मुखिया, लोकश बमसहित विदेशी खेलाडी भारतका पुनित मेहरा, पाकीस्तानकामुहमद जैद आलम र अफगानिस्तानका नोमन खान रहेका छन् ।

त्यसैगरी पारसको कप्तानीमा रहेको चितवनमा विदेशी खेलाडी युएइका रोहन मुस्ताफा, हङ्कङ्का बाबर ह्यात र भारतका सन्नी पटेलसहित आरिस शेख, करण केसी, भुवन कार्की, रामनरेश गिरी लगायतका खेलाडी रहेका छन् ।