अखबार नेपाल ट्रेन्डिङ

काठमाडौं: साफ महिला क्लब च्याम्पियनसिपको आफ्नो तेस्रो खेलमा नेपाली क्लब एपीएफले आज पाकिस्तानको कराची सिटीसँग खेल्दैछ । दुई खेलमा चार अंक जोडेको एपीएफले आज तेस्रो खेल खेल्न लागेको हो ।

एपिएफको २ खेलको प्रदर्शनलाई हेर्दा एपिएफ महिला क्लब च्याम्पियनसिपको फाइनलको दाबेदार देखिन्छ । आज हुने खेलको नतिजा एपिएफलाई फाइनल पुग्नका लागि महत्वपूर्ण हुनेछ । भारतीय क्लब इस्ट बंगाल लगातार २ खेल जित्दै ६ अंकका साथ शीर्ष स्थानमा छ ।

इस्ट बंगाल च्याम्पियनसिपको मुख्य दाबेदारका रुपमा देखिएको छ । एपिएफले २ खेलमा ४ अंक जोडेको छ र टोली दोस्रो स्थानमा छ । यस्तोमा ३ खेलमा २ अंकसहित तेस्रो स्थानमा रहेको कराँची सिटी एफसीले आज एपिएफसँग खेल्नेछ ।

एपिएफ र कराँची सिटीको खे‌ल दिउँसो २ बजे सुरु हुनेछ । लिग चरणको अन्तिम खेल अघि फाइनलमा स्थान सुरक्षित गर्ने सम्भावना‌ बनाउनका लागि एपिएफले आजको खेल जित्नुपर्नेछ । आजको खेलमा हार वा बराबरीले एपिएफले फाइनल पुग्नका लागि इस्ट बंगालसँगको खेल र बाँकी खेलको नतिजा कुर्नुपर्ने हुन्छ ।

एपिएफले पहिलो खेलमा बंगलादेशको नसरिन स्पोर्ट्स एकेडेमीलाई ४-० ले हराउँदै दमदार सुरुवात गरेको थियो । तर दोस्रो खेलमा भने भुटानको ट्रान्सपोर्ट युनाइटेडसँग बराबरीमा रोकिएपछि आजको खेलमा एपिएफ दबाबमा हुनेछ । ट्रान्सपोर्टको पनि २ अंक छ । नसरिनको १ अंक छ ।

दक्षिण एसियाली फुटबल महासंघ (साफ) ले पहिलो पटक आयोजना गरेको च्याम्पियनसिपमा ५ सदस्य राष्ट्रको लिग च्याम्पियनको सहभागिता छ । सिंगल राउन्ड रोबिनपछि शीर्ष २ टोलीले फाइनल खेल्नेछन् ।

च्याम्पियनसिपको विजेताले १० हजार अमेरिकी डलर र उपविजेताले ५ हजार अमेरिकी डलर तथा बाँकी तीन टोलीले समान २ हजार अमरिकी डलर प्राप्त गर्नेछन् । एन्फाले प्रतियोगिताको लागि दुई खालको टिकटदर कायम गरेको छ । साधारणतर्फ ३०० र भीआईपीतर्फ ५०० को टिकट मूल्य राखिएको छ ।