अखबार नेपाल ट्रेन्डिङ

काठमाडौं: नेपाल पुलिस क्लबकी‌ मिना देउवा एलभिडी झापा महिला गोल्डकप फुटबल प्रतियोगिताको सर्वोत्कृष्ट खेलाडी चुनिएकी छिन् । मिनाकै एक मात्र गोलमा घरेलु महिला फुटबलको सर्वाधिक सफल टोली एपिएफ फुटबल क्लबलाई १-० गोल अन्तरले हराउँदै पुलिस च्याम्पियन बनेको थियो । उनले २२औं मिनेटमा गरेको गोल खेलको निर्णायक बन्यो ।

मिनाले सर्वोत्कृष्ट खेलाडी वापत १ लाख ५० हजार रुपैयाँसहित ट्रफी प्राप्त गरिन् । उनी प्रतियोगिताको सर्वाधिक गोलकर्ता समेत बनिन् । फाइनलमासहित ३ खेलमा मिनाले ७ गोल गरेकी थिइन् । मिनाले कात्तिक १० गते इरानविरुद्ध खेल्दै राष्ट्रिय महिला फुटबल टोलीबाट डेब्यु गरेकी थिइन् । पुलिसकै पूजा राना प्लेयर अफ दि म्याच घोषित भइन् ।

त्यस्तै पुलिसकी उषा नाथ उत्कृष्ट गोलकिपर, एपिएफकी मनमाया दमाई उत्कृष्ट डिफेन्डर, एपिएफकी रेनुका नगरकोटी उत्कृष्ट मिडफिल्डर, एपिएफकी उत्कृष्ट फरवार्ड अनिता बस्नेत (एपिएफ) उत्कृष्ट फरवार्ड, पुलिसका भोला सिलवाल उत्कृष्ट प्रशिक्षक चुनिए ।

त्रिभुवन आर्मी फुटबल क्लबकी जेनिफर राना मगर उदियमान खेलाडी घोषित भइन् । उत्कृष्टले समान २५ हजार रुपैयाँ प्राप्त गरे । विजेता पुलिसले उपाधिसहित १० लाख १० हजार र एपिएफले ५ लाख रुपैयाँ प्राप्त गर्यो । कात्तिक १७ गते सुरु भएको प्रतियोगितामा ८ टोलीको सहभागिता थियो ।