अखबार नेपाल ट्रेन्डिङ

एजेन्सी: इङ्ग्लिस प्रिमियर लिगको शीर्ष स्थानको लिभरपुल बराबरीमा राकिएको छ । बिहिबार बिहान भएको खेलमा लिभरपुल एभर्टनसँग २-२ को बराबरीमा रोकिएको हो ।

घरेलु मैदानमा खेलको ११औं मिनेटमा एभर्टनका बेटोको गोलमा टोलीले सुरुवाती अग्रता लिएको थियो । त्यसको ५ मिनेट पछि नै लिभरपुलका एलेक्स म्याक एलिसेल्टरले बराबरी गोल फर्काए । खेलको ७३औं मिनेटमा मोहम्मद सलाहले गोल गर्दै लिभरपुललाई २-१ को स्थितीमा पुर्याए ।

दोस्रो हाफको इन्ज्युरी समयको अन्तिम मिनेटमा एभर्टनका जेम्स टार्कोव्स्कीले गोल गर्दै गुमाई सकेको खेल बराबरीमा पुर्याए । टार्कोव्स्कीले बराबरी गोल गरेपछि मिडफिल्डर अब्दुलाए डौकौरेले लिभरपुलका समर्थकहरू अगाडि गएर उत्सव मनाएका थिए । उक्त घटनाले लिभरपुलका खेलाडीहरूको आक्रोश बढायो ।

लिभरपुलका खेलाडी कर्टिस जोन्सले डौकौरेको व्यवहारलाई लिएर असन्तोष जनाउँदै उनलाई समात्ने प्रयास गरे । रेफ्री माइकल ओलिभरले विवाद शान्त भएपछि डौकौरे र जोन्सलाई दोस्रो पहेँलो कार्ड देखाउँदै मैदानबाट बाहिर पठाए । त्यसपछि लिभरपुलका प्रशिक्षक अर्ने स्लटले रेफ्रीसँग आक्रामक रूपमा हात मिलाएपछि उनलाई पनि सिधै रातो कार्ड दिइयो । लिभरपुलका सहयक प्रशिक्षक सिप्के हल्सहोफलाई पनि रेड कार्ड देखाइयो ।

बराबरीसँगै लिभरपुल २४ खेलमा ५७ अंकका साथ शीर्ष स्थानमा कायमै छ । एभर्टन भने समान खेलमा २७ अंकका साथ १५औं स्थानमा छ ।