अखबार नेपाल ट्रेन्डिङ

काठमाडौं: नेपाली कांग्रेस लोकतान्त्रिक खेलकुद संघ महाधिवेशन निर्देशन समितिको आयोजनामा माघ १० गतेदेखि दशरथ रंगशालामा जारी सभापति कप फुटबल प्रतियोगिताको ट्रफी आज सार्वजनिक गरिदैछ ।

विहान ११ बजे तीनकुनेबाट युवाहरुको मोटरसाइलक र्याली सुरु गरि उक्त र्याली तिनकुने-एयरपोर्ट-गौशाला-रातोपुल-कमलपोखरी-दरबारमार्ग हुँदै शहीदगेट पुगेर ट्रफी सार्वजानिक गरिने आयोजकले जनाएको छ । यसैगरी, प्रि म्याच कन्फ्रेन्स दिउँसो साढे १ बजे दशरथ रंगशालाको मिडिया सेन्टरमा हुने पनि आयोजकले जानकारी गराएको छ ।

यसैबीच मंगलबार भएको दोस्रो सेमिफाईनल खेलमा आयोजक नेपाल लोकतान्त्रिक खेलकुद संघ बागमती प्रदेश (बागमती)ले न्युरोड टिम (एनआरटी)लाई टाइब्रेकरमा पराजित गर्दै फाईनलमा प्रवेश गरेको छ । त्रिपुरेश्वरस्थित दशरथ रंगशालमा भएको खेलको निर्धारित ९० मिनेटको खेल २–२ को बराबरीमा सकिएपछि विजेताको छिनोफानो टाइब्रेकरमा गरिएको थियो ।

टाइब्रेकरमा एनआरटीलाई ४–२ ले पराजित गर्दै बागमती फाइनलमा पुग्न सफल भयो । योसँगै बागमतीले उपाधिका लागि संकटा फुटबल क्लबसँग खेल्नेछ । संकटाले पहिलो सेमिफाइनलमा मच्छिन्द्र फुटबल क्लबलाई सडनडेथमा ८–७ ले पराजित गरेको थियो ।

टाइब्रेकरमा बागमतीका नवीन लामा, फोडे फोफना, राजन तिवारी र कुलदीप कार्कीले गोल गरे । एनआरटीका अविषेक लिम्बू र कृतिशरत्न छुन्जुले गोल गरे । सरोज तामाङको प्रहार विकेश कुथुले रोके । सुमित श्रेष्ठको प्रहार माथिल्लो बारबाट आकासिएको थियो । खेलको सुरुआतदेखि नै बागमतीले एनआरटीलाई दबाबमा राखेको थियो । फलत: ११औं मिनेटमै सन्दीपले बागमतीलाई सुरुआती अग्रता दिलाए । कमल श्रेष्ठको थ्रो बललाई सन्दीपले पेनाल्टी बक्सबाट सिधै फार पोस्टमा गोल गरे ।

सेनेगाकाइज एलेक्सले त्यसको तीन मिनेटपछि नै अग्रता दोब्बर बनाए । गिदोन नाह केरमेहले दिएको बललाई सिक्स यार्ड बक्सबाट एलेक्सले सोही दिशामा गोल गरे। दोस्रो हाफको सुरुआतमै एनआरटी खेलमा फर्काउने संकेत देखाए । हेनरी पोकुले बक्सबाट दिएको बललाई कृतिशरत्न छुन्जुले सहजै जाली चुमाए । त्यसको तीन मिनेटपछि नै एनआरटीले खेलमा फर्किने अवसर गुमायो । कृतिशको कर्नरमा आएको बललाई पोकुले हेडर गरेका थिए । तर, गोलकिपर विकेश कुथु बाधक बने । खेलको ६९औं मिनेटमा कृतिशले नै अग्रता दोब्बर बनाए । विवेक गुरुङको क्रसलाई उनले वान टचमै गोल गरे । योसँगै खेल २–२ को बराबरीमा गएको थियो ।