अखबार नेपाल ट्रेन्डिङ

काठमाडौं: साफ महिला च्याम्पियनसिप २०२४ अन्तर्गत समूह चरणको अन्तिम खेलमा नेपालले श्रीलंकालाई ६-० गोल अन्तरले हराउँदै समूह विजेता बनेको छ । दशरथ रंगशालामा सम्पन्न खेलमा नेपालका लागि रेखा पौडेलले २ गोल गर्दा सावित्रा भण्डारी साम्बा, रश्मीकुमारी घिसिङ, सविता राना मगर र अमिषा कार्कीले १-१ गोल गरे ।

नेपाल र भुटानको समान ७-७ अंक भएपनि गोलअन्तरमा नेपाल १ गोलले अघि रहँदै समूह विजेता बनेको हो । अब सेमिफाइनल खेल आइतबार हुनेछ । पहिलो सेमिफाइनल दिउँसो १:३० बजे बंगलादेश र भुटानबीच हुनेछ । दोस्रो सेमिफाइनलमा साँझ ५:३० बजे नेपाल र भारत भिड्नेछन् ।

पहिलो हाफमै ४ गोल गरेको नेपालले दोस्रो हाफको सुरुवाती समयमा नै पाँचौ गोल गर्यो । त्यसपछि भने नेपालले अर्को गोल थप्न लगातार आक्रमण सिर्जना गरेपनि अग्रता बढाउन सकेन । इन्ज्युरी समयमा रश्मीकुमारी घिसिङले हेडरमार्फत गोल गर्दै नेपालको ६-० को जित पक्का गरिन् ।

खेलको आठौं मिनेटमा सविताको गोलमा नेपालले अग्रता लियो । ११औं मिनेटमा साम्बाले उत्कृष्ट गोल गरिन् । १३ औं मिनेटमा नेपालका लागि रेखाले गोल गरिन् । ३७ औं मिनेटमा साम्बाले पेनाल्टी क्षेत्र बाहिरबाट गरेको प्रहारलाई रेखाले हल्का छुँदै गोलको दिशा दिइन् र नेपालले ४-० को अग्रता लियो । । दोस्रो हाफको सुरुवाती मिनेटमै नेपालले पाँचौ गोल थप्यो । खेलको अतिरिक्त समयको दोस्रो मिनेटमा रश्मीले गोल गर्दै नेपालको समूह विजेता पक्का गरिन् ।

Photo Source: All Nepal Football Association-ANFA (Facebook Page)