अखबार नेपाल ट्रेन्डिङ

काठमाडौं: साफ महिला च्याम्पियनसिप २०२४ अन्तर्गत आज लिग चरणको अन्तिम खेलमा दुई खेलहरु हुँदैछन् । त्रिपुरेश्वरस्थित दशरथ रंगशालामा आज हुने पहिलो खेलमा १:३० बजे माल्दिभ्स र भुटानबीच प्रतिस्पर्धा हुनेछ भने दोस्रो खेलमा साँझ ५:३० बजे नेपाल र श्रीलंकाबीच प्रतिष्पर्धा हुनेछ ।

आजको नतिजाबाट समूह ‘बी’को विजेता बन्ने टोलीले समूह ‘ए’को उपविजेता भारतसँग प्रतिस्पर्धा गर्नेछ भने समूह ‘बी’को उपविजेता बन्ने टोलीले समूह ‘ए’को विजेता बंगलादेशसँग प्रतिस्पर्धा गर्नेछ । अहिलेसम्मको प्रदर्शन र आँकडा हेर्दा नेपालको सेमिफाइनलमा भारतसँग भेट हुने सम्भावना देखिएको छ । समूह चरणको पहिलो खेलमा भुटानसँग गोलरहित बराबरी खेलेको नेपालले दोस्रो खेलमा माल्दिभ्सलाई ११-० को भारी गोल अन्तरले पराजतिग गरेको थियो ।

दुई खेलको समाप्तिमा नेपाल र भुटान दुवैको समान ४-४ अंक छ भने श्रीलंकाको ३ अंक छ । दुवै खेल हारेर अन्तिम खेल अघि नै प्रतियोगिताबाट बाहिरिएको माल्दिभ्सका लागि भुटानसँगको खेल औपचारिकता मात्र सीमित हुनेछ । तर त्यही खेल भुटानका लागि महत्त्वपूर्ण छ । खेल भुटानले जिते उसको ७ अंक हुनेछ भने बराबरीले ५ अंक या हारले ४ अंकमै सीमित बन्नेछ ।

अन्तिम खेलमा नेपालसँग श्रीलंकालाई भने अर्को चरणमा जान खेल जित्नै पर्नेछ । सो खेल जितेमा नेपालको प्रतियोगिताबाटै बाहिरिने पनि सम्भावना हुन सक्छ । तर श्रीलंकालाई भुटानले पनि सहजै जितेको र भुटानसँग बराबरी खेले पनि नेपालले एकपक्षीय खेल पस्किएकाले उसका सामु श्रीलंकाको जितको सम्भावना असम्भव देखिन्छ ।

नेपाल ६ वटा संस्करणमा ५ वटामा उपविजेता र एउटामा सेमिफाइनलमा रोकिएको थियो । श्रीलंका सन् २०१२ को दोस्रो, सन् २०१४ को तेस्रो, सन् २०१९ को ५ औँ र सन् २०२२ को छैटौँ संस्करणमा गरी ३ पटक सेमिफाइनलमा रोकिएको थियो । श्रीलंकाविरुद्ध नेपालले सन् २०१२ मा ३-० ले  र सन् २०१९ मा ४-० ले श्रीलंकालाई पाखा लगाएर फाइनल यात्रामा ‘ब्रेक’ लगाइदिएको थियो ।

सन् २०१४ मा समूहचरणमै नेपालद्वारा श्रीलंका पराजित भएको थियो । सो संस्करणमा श्रीलंका सेमिफाइनल पुगेपनि भारतसँग पराजित भएको थियो । सन् २०१६ मा पनि श्रीलंका भारतसँग १-० गोल अन्तरले पराजित हुन पुग्यो । सन् २०२२ को गत संस्करणमा पनि श्रीलंका नेपालसँग ६-० ले पराजित हुँदै समूह चरणबाटै बाहिरिएको थियो । श्रीलंकाले नेपाललाई अहिलेसम्म जित्न सकेको छैन भने नेपाली पोष्टमा गोल पनि गर्न सकेको छैन ।