अखबार नेपाल ट्रेन्डिङ

काठमाडौं: फिफा विश्वकप २०२६ को एसियाली छनोटमा साउदी अरबको दम्माम शहरमा सम्पन्न खेलमा नेपाल युएईसँग ४-० गोल अन्तरले पराजित भएको छ । नेपालले छनौट चरणको ५ खेलमा कुनैपनि गोल नगरी १८ गोल खान पुगेको छ ।

युएईसँग नेपाल पहिलो हाफको दुई मिनेटको अन्तरालमा दुई गोल खान पुग्यो । हरिब अलमुसार्रकले नै दुवै गोल गरे । खेलको १२औं मिनेटमा अल्दुल्लाह अलहम्मादीको क्रसमा फारपोस्टमा खाली रहेका अलमुसार्रक हेडर प्रहार गर्दै गोल गरे । बल सिधै किरण चेम्जोङको हाततर्फ गएपनि उनले गोल बचाउन सकेनन् । दुई मिनेट पश्चात उनले नै अग्रता दोब्बर बनाए । अली सलेहको उत्कृष्ट पासमा बक्समा रन बनाउँदै अलमुसार्रक ले अग्रता दोब्बर बनाए ।

खेलको ३६औं मिनेटपछि नेपालले लगातार तीन मौका खेर फाल्यो । विश्वकप छनोटको दोस्रो चरणमा पहिलो गोलको खोजीमा रहेको नेपालले मौकाको सदुपयोग भने गर्न सकेन । ३६औं मिनेटमा सनिशको क्रसमा जिलेस्पी जंग कार्कीको प्रहार पोस्टको माथिबाट बाहिरियो । अर्को मिनेटमा नेपालले लगातार दुई प्रहार क्रसबारमा प्रहार गर्यो ।

सनिशको क्रसमा नै सञ्जीव विष्टको हेडर क्रसबारमा लागेर फर्कियो । त्यसलगत्तै विशाल बस्नेतको प्रहारमा पनि बल ब्लक भएर क्रसबार बाधक बन्यो । खेलको ५३औं मिनेटमा युएईले तेस्रो गोल गर्यो । दोस्रो गोलमा उत्कृष्ट असिस्ट गरेका अली सलेहले बक्सको छेउबाट उत्कृष्ट फिनिश गर्दै अग्रता तीन गोलको बनाए । ७५औं मिनेटमा हसेन मोहम्मदले चौथो गोल गरे । किरण गोललाइन बाट अगाडि आएको मौकामा मैदान मध्यभागबाट उनले गरेको प्रहारले जालि चुमेको थियो ।

नेपालका प्रशिक्षण भिन्सेन्जो अल्बर्टो अनेसेले बसन्त जिम्बालाई सुरुवाती रोजाइमा राख्दै डेब्यु दिएको थियो । तर दुई गोल पश्चात नेपालले २१औं मिनेटमा उनी सहित सौभाग्य राईलाई बाहिर निकाल्दै सनिश श्रेष्ठ र छिरिङ लामालाई मैदान प्रवेश गराएका थिए । घरेलु मैदानमा हुनुपर्ने यो खेल दशरथ रंगशाला अयोग्य रहेका कारण साउदी अरब (न्यूट्रल भेन्यू) मा खेलाईएको छ । नेपालले अब छनोटको दोस्रो चरणको अन्तिम खेलमा जेठ ११ गरे यमन विरुद्ध सोहि स्टेडियममा खेल्नेछ ।