अखबार नेपाल ट्रेन्डिङ

काठमाडौं: अमेरिका र वेस्ट इन्डिजले संयुक्त रुपमा आयोजना भइरहेको जारी विश्वकपमा नेपालले आज नेदरल्यान्ड्सँग खेल्दै २०२४ आइसीसी टि-२० विश्वकपको यात्रा सुरु गर्दैछ । खेल नेपाल समय अनुसार मंगलबार राति ९:१५ बजे सुरु हुनेछ ।

टि-२० विश्वकपमा नेपालले १० वर्षपछि खेल्न लागेको हो । यसअघि नेपालले पछिल्लो पटक सन् २०१४ मा टि-२० विश्वकप खेलेको थियो । विश्वकपमा नेपाल र नेदरल्यान्ड्स पहिलो पटक भिड्न लागेका हुन् । नेदरल्यान्ड्स टि-२० विश्वकपमा नेपालको चौथो प्रतिद्वन्द्वी पनि हो । यसअघि नेपालले सन् २०१४ मा हङकङ, बंगलादेश र अफगानिस्तानविरुद्ध प्रतिस्पर्धा गरेको थियो ।

टि-२० आईमा नेपालका लागि नेदरल्यान्ड्स परिचित टोली हो । यी दुई टोलीले सन् २०१५ यता ३ महिना अघिसम्म १२ खेल खेलिसकेका छन् । त्यसमा नेपालले ५ खेल र नेदरल्यान्ड्सले ६ खेल जितेको छ । एउटा खेल भने नतिजा खेल निस्केन । नेपालले ५ मध्ये ३ खेल कीर्तिपुरस्थित त्रिवि मैदानमा जितेको थियो ।

नेपाल र नेदरल्यान्ड्स रहेको समूह डीमा आज दक्षिण अफ्रिकाले श्रीलंकालाई ६ विकेटले पराजित गरेको छ । समूहमा अर्को टोली बंगलादेश रहेको छ । सबैले एक अर्कासँग खेलेपछि समूहका शीर्ष २ टोली सुपर ८ मा पुग्नेछन् ।