अखबार नेपाल ट्रेन्डिङ

काठमाडौं: जारी आईसीसी यू-१९ विश्वकप अन्तरगत सुपर सिक्सको पहिलो खेलमा आज नेपालले बंगलादेशसँग खेल्दैछ । खेल नेपाली समय अनुसार दिउँसो १:४५ बजे सुरु हुनेछ ।

नेपालले शुक्रबार अफगानिस्तानमाथि १ विकेटको ऐतिहासिक जित हात पार्दै सुपर सिक्समा पुगेको थियो । पहिलो खेलमा न्युजिल्यान्डसँग ६४ र दोस्रो खेलमा पाकिस्तानसँग ५ विकेटले पराजित भएपनि समूह चरणको निर्णायक खेलमा नेपालले अफगानिस्तानलाई पराजित गरी सुपर सिक्समा पुगेको थियो । समूह चरणका खेलमा बंगलादेशले अमेरिकालाई १२१ रन र आयरल्याण्डमाथि ६ विकेटको जित निकालेको थियो । भारतसँग भने ८४ रनले पराजित भएको थियो ।

नेपाल र बंगलादेशबीच विश्वकपमा तेस्रो पटक आमनेसामने हुन लागेका हुन् । विश्वकपमा यि दुईबीच सन् २००२ मा न्यजिल्याण्डमा पहिलो प्रतिस्पर्धा भएको थियो । जहाँ नेपालले बंगलादेशलाई २३ रनले हराएको थियो । दोस्रो पटक सन् २०१६ मा बंगलादेशमै भएको विश्वकपमा नेपाल ६ विकेटले पराजित भएको थियो । त्यस्तै यू–१९ एसिया कपमा २ पटक भेट हुँदा दुवै खेलमा बंगलादेश विजयी भयो । सन् २०१९ मा बंगालादेशले नेपाललाई ६ विकेटले हराएको थियो भने २०२१ मा १५४ रनको फराकिलो अन्तरले हराएको थियो ।

समूह ‘डी’ को तेस्रो हुने टोलीले समूह ‘ए’ को पहिलो र दोस्रो स्थानसँग खेल्ने प्रावधान अनुसार नेपालले भारत र बंगलादेशसँग खेल्न लागेको हो । दोस्रो खेल माघ १९ गते नेपालले भारतसँग प्रतिस्पर्धा गर्नेछ । भारत यू–१९ विश्वकपकै सर्वाधिक सफल टोली हो । पाँच पटकको विश्वकप विजेता भारत ३ पटक उपविजेता भइसकेको छ ।

नेपाल र भारतबीच विश्वकपमा यसअघि दुई खेल भइसकेको छ । जहाँ नेपालले दुवै खेल गुमाएको छ । श्रीलंकामा सन् २००० मा भएको तेस्रो संस्करणमा भारतसँग ८ विकेटले हारेको नेपाल २०१६ मा भएको खेलमा ७ विकेटले पराजित भएको थियो । यू–१९ विश्वकपमा नेपालले यसअघि सात पटक सहभागिता जनाइसकेको छ । यो पटक नेपाल आठ वर्षपछि प्रतियोगितामा सहभागी भएको हो ।