अखबार नेपाल ट्रेन्डिङ

काठमाडौं: एसिया कप सुपर फोर अन्तर्गत भारत र पाकिस्तानबीचको खेल आज पनि हुने भएको छ । खेल साढे २ बजे सुरु हुनेछ । आइतबार खेल वर्षाका कारण रिजर्भ डे मा गएको हो ।

आज हुने खेलमा हिजो रोकिएकै स्थितिबाट खेलले निरन्तरता पाउने भएको हो । श्रीलंकाको कोलम्बोमा  पाकिस्तानले टस जितेर फिल्डिङ रोजेपछि पहिले ब्याटिङमा उत्रिएको भारतलाई कप्तान रोहित शर्मा र शुभ्मन गिलले उत्कृष्ट सुरुवात दिलाएका थिए ।

यी दुईले पहिलो विकेटका १६ दशमलब ४ ओभरमा १२१ रनको साझेदारी गरेका थिए । पहिलो पावर प्लेमा पाकिस्तानी बलर विकेटविहीन रहे । साहिन साह अफ्रिदीले पहिलो ओभरमा सुरुवातका पाँच बल डट फालेका थिए । तर अन्तिम बलमा रोहितले छक्का प्रहार गरे । यो भन्दा अघिसम्म साहिनलाई अन्तराष्ट्रिय क्रिकेटमा पहिलो ओभरमा कुनैपनि ब्याटरले छक्का हिर्काएका थिएनन् । महँगा सावित भएका साहिनले आफ्नो सुरुवाती तीन ओभरमा ३१ रन खर्चिएका थिए ।

खेलको १८औं ओभरमा सदाव खानले रोहतिलाई आउट गर्दै साझेदारी तोडे । रोहितले ४९ बलमा ५६ रन बनाए । उनी एसिया कपमा पाकिस्तानविरुद्ध सर्वाधिक ६ अर्धशतक बनाउने खेलाडी पनि बनेका छन् । ओडीआई करियरमा उनको यो ५०औं अर्धशतक हो । ५८ रनमा गिल अफ्रिदीको बलमा मैदान बाहिरिए । भारत २४ ओभर एक बलमा दुई विकेट गुमाएर १४७ रनको स्थितिमा रहँदा पानी परेपछि खेल रोकिएको थियो । त्यसपछि खेल सुरु हुन सकेन र रिभर्ड डे मा हुने निश्चित भयो ।

आज ८ रनमा खेलिरहेका विराट कोहली ८ र १७ रन बनाएका के एल राहुलले इनिङस अघि बढाउनेछन् । जारी एसिया कपमा भारत र पाकिस्तान दोस्रो पटक आमने सामने भएका हुन् । समूह चरणको खेल पनि वर्षाका कारण रद्द भएको थियो ।