अखबार नेपाल ट्रेन्डिङ

काठमाडौं: बागमती प्रदेश क्रिकेट संघको चुनाव आज हुँदैछ । ललितपुरमा हुने चुनावमा ३७ मतदाताले १३ सदस्यीय कार्यसमिति चयन गर्ने छन् ।

६ वटा जिल्लाका ४-४ प्रतिनिधि र पुरानो कार्यसमितिका १३ पदाधिकारी गरी ३७ जनाले नयाँ कार्यसमितका लागि मतदान गर्नेछन् । राष्ट्रिय क्रिकेट टोलीका पूर्वकप्तान पारस खड्काले बागमती प्रदेश अध्यक्षमा उम्मेदवारी घोषणा गरिसकेका छन् । उनलाई चार जिल्लाको समर्थन छ ।

भक्तपुर, काठमाडौं, ललितपुर र मकवानपुरले उनलाई समर्थन जनाएका हुन् । पारस यसअघि काठमाडौं जिल्ला कार्यसमितिमा सर्वसम्मत सदस्य निर्वाचित भएर प्रदेशका लागि प्रतिनिधि चयन भएका थिए ।

यता प्रदेश अध्यक्षमा उमेश पियाले पनि उम्मेदवारी दिने तयारी गरिरहेका छन् । उनी चितवन जिल्ला संघमा पदाधिकारी निर्वाचित भएका थिए । यता नुवाकोट जिल्ला संघका एक प्रतिनिधले पारस समूहले प्रदेशमा गुटबन्दी गरेको आरोप लगाएका छन् ।

चार जिल्लाका प्रतिनिधिहरु यदि पारसको समर्थनमा अडिए भने उनको १६ भोट सुनिश्चित हुनेछ । अध्यक्षमा यदि द्वीपक्षीय प्रतिस्पर्धा भयो भने चुनाव जित्न १९ भोट चाहिन्छ । पारसले पुरानो कार्यसमितिबाट ३ भोट मात्र तान्दा चुनाव जित्न सक्छन् ।

यदि पारसले सबैलाई समेटर जाने नीति लिए भने सर्वसम्मत हुन सक्ने अवस्था पनि देखिन्छ । तर, चार जिल्लाको गुट बनाएर उनले चितवन र नुवाकोटलाई बाइपास गरिरहेका छन् ।

यदि पारसले बागमती प्रदेशमा जिते भने उनी त्यतिमै रोकिन्छन् कि रोकिँदैनन् भन्ने प्रश्न छ । धेरैले उनी केन्द्रमा पनि चुनाव लड्नसक्ने चर्चा गरिरहेका छन् । पारस भने यस विषयमा खुलेका छैनन् । बागमती प्रदेश अध्यक्ष हुँदा हुँदै केन्द्रीय अध्यक्षमा लड्न विधानले रोक्दैन ।