अखबार नेपाल ट्रेन्डिङ

काठमाडौं: कृष्ण जन्माष्टमीको अवसर पारेर ‘तेस्रो उपत्यकाव्यापी गोल्डेन पिक अन्तर विद्यालय तीज नृत्य प्रतियोगिता’ आयोजना गरिने भएको छ ।

शुक्रबार पत्रकार सम्मेलनको आयोजना गरि गोल्डेन पिक हाई स्कुलले प्रतियोगिताको जानकारी दिएको हो । नेपाली कला संस्कृतिलाई मौलिक रुपमा राख्न र आगामी पुस्ताहरुलाई आफ्नो कला संस्कृतिको जगेर्ना गर्नका साथै उक्त पर्व तथा संस्कृतिका नाममा भएका विकृतिहरु, कुरीति र कुसंस्कारलाई निर्मुल पार्नको लागि पनि यो कार्यक्रमको आयोजना गरिएको विद्यालयकले जानकारी गराएको छ ।

नेपाली मौलिक पर्वहरुको साँस्कृतिक महत्वको अवगत गराउन र बालिकाहरुमा भएको प्रतिभा प्रष्फुटन गर्न यस्ता खालका कार्यक्रमले ठूलो सहयोग मिल्ने विद्यालयको विश्वास छ । तीज पर्व आम नेपाली महिलाको मात्र नभई आम नेपालीहरुले देश विदेशमा पारिवारिक पुनर्मिलन र आपसी भेटघाट गरी नृत्य गरेर मनाउने परम्परा रहि आएको छ ।

शारीरिक मात्र नभै मानसिक  स्वास्थ्यको हिसाबले पनि यो महत्वपूर्ण विधाको रुपमा मौलाउदै गएको र सामुहिक भावना जागृत गर्न, आफ्नो मौलिक लोक भाकाको बारेमा जानकारी दिन तीजको महत्व बुझाउन यस्ता खालको कार्यक्रमहरुले ठूलो मद्दत पुर्याउने आयोजक विद्यालयको भनाई छ ।

नेपाली कला, संस्कृति, भाषा हाम्रा वैभ हुन् । यिनलाई विस्तार र विकास गर्न सकेको योगदान दिनु हामी सबैको कर्तव्य हो । यही भावलाई शिरोपर गर्दै तेस्रो उपत्यका व्यापी गोल्डेन पिक तीज नृत्य प्रतियोगिता आयोजना गरिएको विद्यालयले पत्रकार सम्मेलन मार्फत जानकारी गराएको छ । करिव ५ सय सहभागी हुने प्रतियोगिता भाद्र २० गते नाचघर जमलमा आयोजना हुनेछ ।