अखबार नेपाल ट्रेन्डिङ

काठमाडौं: सातौं प्रधानमन्त्री कप राष्ट्रिय भलिब क्लब लिगको पुरुषतर्फ फाइनलमा टिपटप हेल्प नेपाल र नेपाल पुलिस क्लबबीच प्रतिस्पर्धा हुँदैछ ।

यी दुईबीचको उपाधि भिडन्त दिउँसो ३ बजे राष्ट्रिय खेलकुद परिषद् (राखेप) को कभर्डहल त्रिपुरेश्वरमा सुरु हुनेछ ।

हेल्प नेपाल अपराजित रहँदै फाइनलमा पुगेको हो । हेल्प नेपालले ६ खेलमा १६ अंकका साथ शीर्षस्थानमा रहँदै फाइनल पुगेको हो । उता पुलिस ६ खेलमा ५ मा जित र १ मा हारसहित १५ अंकका साथ दोस्रो स्थानमा रहँदै फाइनल पुगेको हो ।

पाकिस्तानका कप्तान तथा स्पाइकर अ‍ैमल खान, माजहर अली र सेटर आदनान रहेको हेल्प नेपाल अपराजित रहँदै उपाधि जित्न चाहन्छ । माजहर र अ‍ैमल दुबैको शक्तिशाली प्रहार सामना गर्न पुलिसलाई सहज भने हुने छैन ।

तर उत्कृष्ट लयमा रहेका विशाल विक, रविन चन्द र सफल विकको जोडी हेल्प नेपाललाई स्तब्ध पार्न चाहन्छ । विशाल उच्च लयमा छन् । आर्मीलाई ३-० को सोझो सेटमा पराजित गर्न उनी नायक बनेका थिए । अनुभवी खेलाडी कुल बहादुर थापा पनि राम्रो लयमा छन् ।

समूह चरणमा हेल्प नेपालले पुलिसलाई ३-२ को सेटमा पराजित गरेको थियो । उक्त खेलमा हेल्प नेपाल २५-२०, २०-२५, ३०-२८, २५-१८ र २४-२२ ले जितेको थियो ।

विजेता टोलीले ६ लाख, दोस्रो हुनेले ३ लाख, तेस्रो हुनेले १ लाख ५० हजार र चौथो हुने टोलीले ७५ हजार रुपैयाँ प्राप्त गर्नेछन् । प्रतियोगितामा पुरुष तथा महिला तर्फ सर्वोत्कृष्ट खेलाडीले समान ३५ तथा उत्कृष्ट सर्भर, सेटर, ब्लकर, स्पाईकर, लिवेरो र प्रशिक्षकले जनही १५ हजार रुपैयाँ प्राप्त गर्ने छन् ।