अखबार नेपाल ट्रेन्डिङ

एजेन्सी: युइएफए युरोपा लिगको प्रि-क्वाटरफाइनलको पहिलो लेगमा इटालियन क्लब युभेन्ट्सले जित निकाल्दा इंग्लिस क्लब आर्सनल बराबरीमा रोकिएको छ ।

युभेन्ट्सले घरेलु मैदानमा जर्मन क्लब फ्रेइवर्गमाथि १–० को जित निकालेको हो । युभेन्ट्सको जितमा एन्जल डि मारियाले दोस्रो हाफमा गरेको गोल नै निर्णायक बन्यो ।

बिहीबार राति भएको खेलमा डि मारियाले ५३औं मिनेटमा फिलिप कोस्टिकको पासमा गोल गर्न सफल भएका थिए । ६२औं मिनेटमा लुकास होलेरले गोल गरेपनि भिएआरबाट मान्यता नपाउँदा फ्रेइवर्ग बराबरीमाबाट चुक्यो ।

जितसँगै युभेन्ट्सको क्वाटरफाइनल पुग्ने सम्भावना जीवित बनेको छ । दोस्रो लेगमा यही नतिजा कायम राख्न सके युभेन्ट्स क्वाटरफाइनलमा पुग्नेछ । फ्रेइवर्गलाई जित आवश्यक हुनेछ । दोस्रो लेग फ्रेइवर्गको मैदानमा १६ मार्चमा हुनेछ ।

यसैबीच गएराती भएको अर्को खेलमा इंग्लिस क्लब आर्सनल पोर्चुगिज क्लब स्पोर्टिङ लिस्वनसँग २–२ गोलको बराबरीमा रोकिएको छ ।

लिस्वोआमा गएराति भएको खेलको २२औं मिनेटमा विलियम सालिवाको गोलबाट आर्सनलले अग्रता लिएको थियो । ३४औं मिनेटमा स्पोर्टिङका गोन्कालोले गोल गर्दै खेललाई १–१ गोलको बराबरीमा ल्याए ।

खेलको ५५औं मिनेटमा पौलिन्होले गोल गरेपछि स्पोर्टिङले खेलमा २–१ को अग्रता लिन सफल भयो । तर, ६२औं मिनेटमा हिडेमासा मारिताले आत्मघाती गोल गरेपछि आर्सनल हारबाट जोगियो ।

बराबरीसँगै दुवै टोलीको क्वाटरफाइनल पुग्ने सम्भावना रहेको छ । अब दोस्रो लेगमा जित हात पार्ने टोली अन्तिम आठमा पुग्नेछ । दोस्रो लेग १६ मार्चको राति आर्सनलको मैदानमा हुनेछ ।