अखबार नेपाल ट्रेन्डिङ

काठमाडौं: कप्तान रोहित पौडल र ओपनर कुशल भुर्तेलले नेपाली ओडिआई क्रिकेट इतिहासकै सर्वाधिक ठूलो साझेदारी गरेका छन् ।

आइसिसी विश्वकप लिग-२ त्रिकोणात्मक ओडिआई सिरिजमा नामिबियाविरुद्ध रोहित र कुशलले कीर्तिमानी शतकीय साझेदारी गरेका छन् ।

जितको लागि २८६ रनको विशाल विजयी लक्ष्य पछ्याएको नेपालले ३३ ओभरमा २ विकेट गुमाउँदै १८६ रन बनाएको छ । रोहित पौडेल ७५ बलमा ७ चौका र ३ छक्कासहित ७२ रनमा अविजित छन् । कुशल भुर्तेल ८३ बलमा ९ चौका र ३ छक्कासहित ८१ रनमा अविजित छन् ।

तेस्रो विकेटका लागि रोहित र कुशलले १३३ रनको अविजित शतकीय साझेदारी गरेका छन् । जुन ओडिआईमा नेपाली ब्याटरले गरेको कुनैपनि विकेटका लागि उच्च साझेदारी हो ।

यसअघि नेपालबाट ओडिआईमा सर्वाधिक ठूलो साझेदारी २०२२ मार्चमा दीपेन्द्रसिंह ऐरी र देव खनालले पपुवा न्युगिनीविरुद्ध तेस्रो विकेटका लागि नै १२९ रनको साझेदारी साझेदारी गरेका थिए ।

कप्तान रोहितले २०औं ओभरको अन्तिम बलमा ब्यक्तिगत २७ रनमा जीवनदान पाएका थिए । नामिबियाका फिल्डरले कभरमा क्याच छोड्न पुगेका थिए । रोहितले ३९ रनमा पुनः जीवनदान पाएका थिए । डिप मिडविकेटमा रोहितको सहज क्याच लो ह्यान्डी लरेन्सले छाडेका थिए । कुशल भुर्तेलले ब्यक्तिगत ५८ रनमा जीवनदान पाएका थिए । कुशलको क्याच जेन निकोल लोफ्टीले क्याच छाडेका थिए ।

नेपालले दोस्रो ओभरमै ओपनर आसिफ शेखलाई गुमाएको थियो । दोस्रो ओभरको पाँचौं बलमा स्पिनर बेनार्ड शोल्टजले आसिफ शेखलाई शून्यमा बोल्ड आउट गरे । दोस्रो विकेटका लागि कुशल भुर्तेल र ज्ञानेन्द्र मल्लले ५० रनको साझेदारी गरेका थिए । ज्ञानेन्द्र मल्ल २५ रनमा जान निकोल लोफ्टी इओटनले एलबीडब्लू आउट गरेका थिए ।

त्यसअघि टियु क्रिकेट मैदानमा टस हारेर पहिला ब्याटिङको निम्तो पाएको नामिबियाले निर्धारित ५० ओभरमा २८५ रनमा अल आउट भएको थियो । नामिबियाका माइकल भान लिंगेनले १३७ बलमा ९ चौका र ५ छक्कासहित सर्वाधिक १३३ रनको कीर्तिमानी इनिङ खेलेका थिए ।

तेस्रो विकेटका लागि जेरार्ड र लिंगेनले १२४ रनको सानदार शतकीय साझेदारी गरेपछि बलियो योगफलमा पुगेको हो । कुशल मल्लले ३७औं ओभरको पहिलो बलमा जेरार्डलाई सन्दीपबाट क्याच गराउँदै शतकीय साझेदारी तोडेका थिए ।

करण केसीले १० ओभरमा १ मेडन खर्चेर ६१ रन खर्चेर ५ विकेट लिए । सन्दीप लामिछानेले १० ओभरमा ६६ रन खर्चेर ३ विकेट लिएका थिए ।