अखबार नेपाल ट्रेन्डिङ

एजेन्सीः युरोपा लिग विजेता आइनट्राक्ट फ्रान्कफर्टलाई २-० ले पराजित गर्दै युरोपेली च्याम्पियन्स लिग विजेता रियल मड्रिडले यूईएफए सुपर कपको उपाधि जितेको छ ।

फिनल्यान्डस्थित हेलसिंकीमा बुधबार राति सम्पन्न खेलमा रियलका लागि डेविड अलाबा र करिम बेन्जेमाले १/१ गोल गरे ।

खेलको ३७औं मिनेटमा क्यासेमिरोले दिएको हाइ बललाई अलाबाले हेडरमार्फत् सहजै गोल गरेका थिए ।

६५औं मिनेटमा बेन्जेमाले रियलको अग्रता दोब्बर पारे । भिनिसियस जुनियरको पासमा बेन्जेमाले पेनाल्टी क्षेत्र बाहिरबाट गरेको प्रहार गोल भएको थियो ।

यससँगै रियलले सुपर कप जित्ने सूचीमा बार्सिलोना र एसी मिलानसँग बराबरी गरेको छ । तीन टोलीले समान ५-५ पटक सुपर कप उपाधि जितेका छन् । लिभरपुलले ४ पटक उपाधि जितेको छ ।