अखबार नेपाल ट्रेन्डिङ

एजेन्सीः स्पेनिस लालिगामा लुईस स्वारेजको गोलमा स्पान्योल माथि बार्सिलोनाले जित निकालेको छ ।

घरेलु मैदान नाओ क्याम्पमा भएको खेलमा बार्सिलोनाले स्पान्योललाई १–० गोल अन्तरले हराउँदै बार्सिलोनाले लालिगाको उपाधि जित्ने आशालाई कायम राखेको छ । हारको सामना गरेको स्पान्योल भने लालिगाबाट रेलिगेशन हुने निश्चित भएको छ ।

गोलरहित पहिलो हाफ खेलेको दुबै क्लब दोश्रो हाफको ८ मिनेटभित्रमा १० खेलाडीमा सिमित बनेको थियो । बार्साका अन्शु फाटीले स्पान्योलका फर्नान्डो कालेरोमाथि फाउल खेलेपछि रेड कार्ड खाए भने स्पान्योलका पोल लोजानो पनि गलत ट्याकलका लागि रेड कार्ड खाँदै मैदानबाट बाहिर पठाईएका थिए ।

यसपछि ५६औं मिनटमा स्वारेजले गोल गर्दै बार्सालाई उपाधि होडमा महत्वपूर्ण तीन अंक दिलाए । यो जितले बार्सालाई शिर्ष स्थनमा रहेको रियाल मड्रिडबाट एक अंक मात्र पछि पारेको छ । उसको ३५ खेलमा ७६ अंक भएको छ भने रियालको ३४ खेलमा ७७ अंक छ ।

लिगमा तीन चरणको खेल बाँकी रहँदा स्पान्योलको जम्मा २४ अंक छ र अब बाँकी तीनै खेलमा जित निकाले पनि स्पान्योल तल्लो डिभिजनमा घटुवा हुने निश्चित भएको छ ।