अखबार नेपाल ट्रेन्डिङ

एजेन्सीः लिग म्यानेजर्स एसोसियसनका प्रमुख कार्यकारी रिचार्ड बेभानले क्लबहरु तटस्थ मैदानमा खेल्न नमाने इंग्लिस प्रिमियर लिग रद्द हुने बताएका छन् । बीबीसी रेडियोसँग कुरा गर्दै रिचार्डले न्युट्रल भेन्युमा खेल नखेलिए लिग रद्द हुने बताए ।

कोरोना भाईरसको महामारीको कारण प्रिमियर लिग गत मार्च १३ बाट स्थगित गरिएको छ । पछिल्लो समय प्रिमियर लिगले न्युट्रल भेन्युमा खेल खेलाएर सिजनको बाँकी लिग सक्ने तयारी गरेको छ । प्रिमियर लिग क्लबले यस सिजन सुचारुको अनुमानित मिति जुन १२ लाई राखेको छ । तर, अब सरकारले बनाउने लकडाउन नीतिमा भर पर्ने बताईएको छ ।

प्रिमियर लिगका २० क्लबले अब यस सिजन ९२ खेल खेल्न बाँकी रहेको छ । यस सिजन लिभरपुल उपाधि नजिक रहेको छ । लिभरपुल दोस्रो स्थानको म्यानचेस्टर सिटी भन्दा २५ अंकले अघि रहेको छ । लिभरपुलको ८२ अंक रहदा सिटीको ५७ अंक रहेको छ । यस सिजन लिभरपुललाई ऐतिहासिक उपाधि जित्ने अवसर रहेको छ ।