अखबार नेपाल ट्रेन्डिङ

काठमाडौं: संखुवासभाको मादी नगरपालिका-१ स्थित उम्लिङमा एकै परिवारका ६ जनाको हत्या गरेका आरोपीलाई प्रहरीले आज सार्वजनिक गरेको छ ।

घटना भएको ६ दिनपछि हत्यामा संलग्न २६ वर्षीय लोकबहादुर कार्कीलाई प्रहरीले मुख्य अभियुक्त सार्वजनिक गर्न सफल भएको हो ।

गत सोमबार ९० वर्षीय बौद्धमान कार्कीको ६ जनाको परिवारको हत्या भएको थियो । बौद्धमानका ८४ वर्षीया श्रीमती पार्वती कार्की, ५२ बर्षीय तेजबहादुर कार्की, ५२ बर्षीया कमला कार्की, ३२ बर्षीया रञ्जना कार्की, ११ बर्षीय दिपेन कार्की र ७ बर्षीया गोमा कार्कीको हत्या भएको थियो । घरमै रहेका ९० वर्षका बौद्धमान भने सकुशल रहेका थिए ।

गाउँमा धेरै चहलपहल नहुने भएकाले चोरी-डकैतीका लागि सो घटना गराइएको हुन सक्ने प्रारम्भिक अनुमान प्रहरीले गरेको थियो । तर, पैसा तथा सुन घरमै सुरक्षित भेटिएपछि त्यो अनुमान फेल खायो ।

घटनास्थलमा दुईवटा कुकुरलाई प्रयोग गर्दा कुनै सुराक मिल्न सकेको थिएन । कुकुर समेत अल्मलिएर अपराधीसम्म पुग्ने कुनै क्लु नपाएपछि केन्द्रीय अनुसन्धान ब्यूरो सिआईबीको टोली घटनास्थल पुगेको थियो । तर अपराधी पत्ता लगाउन नसकेपछि प्रहरीले पुरै जिल्ला सिल गरेको थियो ।

स्थानीयहरुसँग बयान लिने क्रममा प्रहरीले पहिलोपटक शव देखेको भन्ने लोकबहादुरसँग सोधपुछ गर्यो । लोकबहादुरले एक जना भाइले शव देखेको आफूलाई बताएपछि अरु स्थानीयलाई खबर गरेको बताए । तर, उनले दिएको बयान शंकाष्पद पाइएपछि अनुसन्धान उनीमाथि केन्द्रित भएको थियो ।

उनको घरमा खोजतलासी गर्दा प्रहरीले रगत लागेको कपडा फेला पार्यो । र, त्यसकै आधारमा लोकबहादुर पक्राउ गरे । थप अनुसन्धान गर्दा उनले आफूले नै हत्या गरेको स्वीकारेको प्रहरीले बताएको छ ।

आरोपीले आफूलाई काकाले हेप्ने गरेकोले हत्या गरेको बताएका छन् । सुरुमा तेजबहादुरलाई मात्रै मार्ने सोचे पनि प्रमाण मेटाउनका लागि अरुलाई पनि सिध्याउनुपरेको उनको भनाइ छ ।

घटना विहान साढे ५ बजेको आसपासमा भएको बताइएको छ । धान गोड्न खेताला खोज्न हिँडेका तेजबहादुरलाई मार्न भतिजा लोकबहादुर बाटोमा ढुकेर बसेका थिए । उनले काका तेज बहादुरलाई पछाडिबाट चिर्पटले हानेर ढालेपछि घरबाट श्रीमती र बुहारी रञ्जनाले देखेर चिच्याउँदै आए । त्यसपछि तेजबहादुरले उनीहरुलाई पनि आक्रमण गरेको प्रहरीले जनाएको छ ।

प्रहरीका अनुसार उनीहरुले प्रतिकार गर्न नसक्दा हत्याराले सजिलै हत्या गरेको देखिन्छ । आमाहरुको चिच्याहट सुनेर छोराछोरी बाहिर आएपछि उनीहरुलाई पनि लोकबहादुरले बाँकी राखेनन् । उनले दुई बालबालिकालाई पनि घर माथि लगेर चिर्पट दाउराले हानेर हत्या गरे र घरभित्र कुडो पकाउदै गरेकी पार्वतीलाई पनि भित्तामा ठोकाएर चिर्पटले हानेर मारे । तर घरभित्रै रहेका बौद्धमानलाई भने केही गरेनन् ।

आफूले सबैलाई एउटै चिर्पटले हानेर हत्या गरेको लोकबहादुरले प्रहरीलाई बयान दिएका छन् । त्यही चिर्पट घरमा ल्याएर आगो बाली कुँडो पकाएको उनको बयान छ । त्यसपछि उनी केही थाहा नपाएजसरी प्रस्तुत भएका थिए । उनले प्रहरीलाई अनुसन्धानमा सहयोग गर्दै आएका थिए ।