अखबार नेपाल ट्रेन्डिङ

काठमाडौं: नेपाल भ्रमणमा रहेकी अमेरिकी सहायता परियोजना, मिलेनियम च्यालेन्ज कर्पोरेसन (एमसीसी)को कम्प्याक्ट सञ्चालन विभागकी उपाध्यक्ष फातिमा सुमारले नेपाल र अमेरिकाबीच भएको एमसीसी सम्झौता कार्यान्वयन हुनेमा आफू आशावादी रहेको बताएकी छिन् ।

नेपालले पाँच सय मिलियन अमेरिकी डलर अनुदान पाउनेगरी चार वर्षअघि भएको यो सम्झौता कार्यान्वयनका लागि संसदबाट अनुमोदन हुनुपर्ने व्यवस्था छ । त्यसका लागि राजनीति नै दुई ध्रुबमा विभाजित रहेका बेला सुमार नेपाल आएकी थिइन् ।

नेपालमा रहँदा उनले प्रधानमन्त्री शेरबहादुर देउवा र सबैजसो प्रमुख दलका शीर्ष नेतालाई भेटेकी थिइन् । भेटका क्रममा आफूले यो सहयोग नेपालका लागि किन आवश्यक छ भनेर बुझाउने प्रयास गरेको उनले पत्रकार सम्मेलनमा बताइन् ।