अखबार नेपाल ट्रेन्डिङ

काठमाडौं: नेपाल दूरसञ्चार प्राधिकरणले चालु आर्थिक वर्ष २०७७/७८ को नौ महिनाको तथ्याङ्क सार्जवानिक गर्दै नेपालमा ८८.९३ प्रतिशत जनताको पहुँचमा इन्टरनेट सेवा पुगेको जनाएको छ ।

प्राधिकरणले जनसङ्ख्या प्रक्षेपण (२०११–२०३०) लाई आधार मानेर प्रतिवेदन तयार पारेको हो ।

प्रतिवेदनमा प्राधिकरणले नेपालको कूल जनसङ्ख्या दुई करोड ९८ लाख ७६ हजार ५ सय ३१ लाई आधार बनाएको छ ।

प्राधिकरणको तथ्याङ्क अनुसार चैत महिनासम्म २ करोड ६८ लाख ८२ हजारभन्दा बढीको पहुँचमा इन्टरनेट सेवा पुगेको छ ।

गत फागुनको तुलनामा चैतमा पाँच लाख २६ हजार बढी प्रयोगकर्ता थपिएका छन् । गत फागुनमा दुई करोड ६३ लाख ५६ हजार बढी रहेका थिए ।

तथ्याङ्क अनुसार सबैभन्दा धेरै योगदान मोबाइल इन्टरनेटको रहेको छ । चैतसम्म मोबाइल इन्टरनेटको हिस्सा ६५ दशमलव ३९ प्रतिशत छ ।

एक करोड १७ लाख ६० हजार बढीको पहुँचमा थ्रिजी इन्टरनेट पुगेको छ ।

त्यसमा सबैभन्दा धेरै नेपाल टेलिकमको ९३ लाख ३५ हजार र एनसेलको २४ लाख २५ हजार रहेको जनाइएको छ ।

फोरजीका प्रयोगकर्ता ७८ लाख ७१ हजार ५ सय ५५ पुगेका छन् ।

नेपालमा तीन दूरसञ्चार सेवा कम्पनीले फोरजी सेवा सञ्चालन गरेका छन् ।

तीन कम्पनीमध्येमा सबैभन्दा धेरै ग्राहक एनसेलका रहेका छन् ।

नौ महिनामा एनसेल कम्पनीका फोरजीका ग्राहक ५० लाख १७ हजार १७० पुगेका छन् ।

एनसेलमा एक महिनामा एक लाख ६० हजार ४ सय २८ फोरजी ग्राहक थपिएका छन् ।

गत फागुनमा फोरजीका ग्राहक ४८ लाख ५६ हजार ७ सय ४२ रहेका थिए ।

सरकारी स्वामित्वमा सञ्चालित नेपाल दूरसञ्चार कम्पनी लिमिटेड (नेपाल टेलिकम) नेपाल टेलिकमले ४७ हजार ३ सय ५३ फोरजी प्रयोगकर्ता थपेको छ ।

फागुनमा टेलिकमसँग २५ लाख ८९ हजार २९४ रहेकामा बढेर २६ लाख ३६ हजार ६ सय ४७ पुर्‍याइएको प्राधिकरणले जनाएको छ ।

फिक्स ब्रोडब्यान्डको हिस्सा २२.७८ प्रतिशत रहेको छ ।

यसमा एडिएसएलका आठ लाख सात हजार र एफटीटीएच इन्टरनेट पाँच लाख १५ हजार बढी रहेका छन् ।

इजरायली सेनाद्वारा गाजापट्टीको हमासमा हमला
बैतडीको लगन भन्ने स्थानमा जीप दुर्घटना हुँदा तीन जनाको मृत्यु