नेपाल दूरसञ्चार प्राधिकरणका अध्यक्ष खनालले दिए राजीनामा
वि.सं.२०८० पुस २४ मंगलवार १४:०५
काठमाडौं: नेपाल दूरसञ्चार प्राधिकरणका अध्यक्ष पुरुषोत्तम खनालले राजीनामा दिएका छन् । मोबाइल डिभाइस म्यानेजमेन्ट सिस्टम (एमडीएमएस), टेरामक्सलगायतका प्रणाली खरिद लगायतका विषयमा अनियमितामा संलग्न भएको आरोप लागेपश्चात उनले आज राजीनामा दिएका हुन् ।
उनीमाथि अनियमितताको आरोप लागेपछि सञ्चार तथा सूचना प्रविधिमन्त्री रेखा शर्माले केही समय अगाडि स्पष्टीकरण सोधेकी थिइन् । मन्त्री शर्माले मन्त्रिपरिषद्को बैठकमा बर्खास्त गर्ने तयारी गरेपछि खनालले राजीनामा दिएका हुन् । खनाललाई प्रधानमन्त्री कार्यालयले सोमबार छलफलमा बोलाएको थियो । छलफलमा प्रधानमन्त्री कार्यालयका सचिवले समेत उनको कार्यशैलीप्रति आपत्ति जनाएका थिए ।
मोबाइल डिभाइस म्यानेजमेन्ट सिस्टम (एमडीएमएस) मा प्रभावकारी काम गर्न नसकेको, लिकम्युनिकेसन ट्राफिक मनिटरिङ एन्ड फ्रड कन्ट्रोल सिस्टम (टेरामक्स) प्रणाली खरिद, स्मार्ट सेलको खारेजी र एनसेलको सेयर खरिद बिक्री प्रकरण, इन्टरनेट सेवा प्रदायकहरुसँग कर असुलीलगायत मुद्दामा प्राधिकरण नेतृत्वले प्रभावकारी काम गर्न नसकेको भन्दै आलोचना हुँदै आएपछि सरकार असन्तुष्ट बनेको थियो ।
सार्वजनिक लेखा समितिले टेरामक्स प्रविधि खरिद प्रक्रियाको छानबीन गर्न निर्देशन दिइसकेको छ । प्रतिनिधिसभाको सार्वजनिक लेखा समितिले टेलिकम्युनिकेसन ट्राफिक मनिटरिङ एन्ड फ्रड कन्ट्रोल सिस्टम (टेरामक्स) अध्ययन प्रस्तावका लागि नीतिगत निर्णय गरेको नदेखिएको र मूल सम्झौता समितिलाई प्राप्त नभएको निष्कर्ष निकाल्दै हाललाई सम्पूर्ण प्रक्रिया याथस्थितिमा राख्न नेपाल दूरसञ्चार प्राधिकरणलाई निर्देशन दिएको छ ।
समितिले सो प्रविधि खरिद प्रक्रियाका बारेमा थप अनुसन्धान गरी कानुनबमोजिम अभियोजन अघि बढाउन अख्तियार दुरुपयोग अनुसन्धान आयोगलाई निर्देशनसमेत दिएको छ । सो प्रकरणमा अनुसन्धान गर्दा हरेक महिनाको प्रगति विवरण समितिमा उपलब्ध गराउन पनि अख्तियारलाई आग्रह गरिएको छ ।
वि.सं.२०८० पुस २४ मंगलवार १४:०५