अखबार नेपाल ट्रेन्डिङ

काठमाडौं: अध्यागमन विभागले एक वर्षमा १६ लाखभन्दा बढी नेपाली विदेशिएको जनाएको छ । विभागले सार्वजनिक गरेको तथ्याङ्क अनुसार सन् २०२३ को जनवरी १ देखि डिसेम्बर ३१ सम्म १६ लाख तीन हजार ८३६ नेपाली विदेश गएको उल्लेख छ ।

जसमध्ये सबैभन्दा बढी दुई लाख ७१ हजार ८८ जना संयुक्त अरब एमिरेट्स (यूएई) गएका छन् । यसैगरी भारत जानेको संख्या एक लाख ८० हजार ६०२ छ भने एक लाख ७९ हजार ४४१ जना कतार पुगेका छन् । यस्तै, मलेसिया एक लाख ६५ हजार २०१, साउदी अरेबिया एक लाख ३६ हजार २०३ तथा अष्ट्रेलिया एक लाख ५ हजार ३४३ रहेका छन् ।

विभागका अनुसार सन् २०२३ मा स्थायी बसोबास गर्ने उद्देश्यले ७० हजार ९१५ नेपाली विदेश गएका छन् । जसमा पुरुष ३६ हजार ६६३ र महिला ३४ हजार २५१ छन् । विभागको तथ्याङ्कअनुसार युद्धग्रस्त देश रुस जाने नेपालीको संख्या एक हजार ७९५ रहेको छ भने ९५ जना युक्रेन पुगेका छन् । यो संख्या त्रिभुवन अन्तर्राष्ट्रिय विमानस्थलमाबाट जानेहरूको मात्र हो ।

अहिले विशेष गरेर रुस–युक्रेन युद्धका कारण ती देशहरू बढी जोखिमयुक्त गन्तव्य मानिएको छ । रुस–युक्रेन युद्धका क्रममा रुसी सेनामा भर्ना भएका १० नेपाली मारिएका छन् भने युक्रेनले ४ नेपालीलाई बन्धक बनाएको छ ।

सूची सहितः