अखबार नेपाल ट्रेन्डिङ

काठमाडौं: नेपाल प्रहरीले गैरकानुनी गतिविधिमा संलग्न भएको आशंकामा एक सय जनाभन्दा बढी चिनियाँ नागरिकलाई नियन्त्रणमा लिएको छ । पर्यटक भिसामा नेपाल आएर विभिन्न स्थानमा अवैध गतिविधि गर्दै बसेका चिनियाँहरुलाई प्रहरीले नियन्त्रणमा लिएको हो ।

नेपाल प्रहरीको केन्द्रीय अनुसन्धान ब्यूरो (सीआइबी)को नेतृत्वमा महानगरीय अपराध महाशाखा र महानगरीय प्रहरी परिसर काठमाडौंले सोमबार बिहानैदेखि काठमाडौंका बूढानीलकन्ठ, मनमैजु, सामाखुसी, लाजिम्पाट, बाँसबारी लगायत ठाउँमा छापा पारी एक सय भन्दा बढी चिनियाँलाई पक्राउ गरेको हो । अपार्टमेन्ट, निजी घर र होटलहरुमा छापा मारेर दिनभरमा करिब एक सय जना भन्दा बढी चिनियाँलाई नियन्त्रणमा लिइएको तर भिसा भएका र शंकास्पद नदेखिएका केहीलाई छाडिएको प्रहरीले जनाएको छ ।

प्रहरीले चिनियाँहरुविरुद्धको ‘अपरेसन’ अहिले पनि जारी राखेको छ । पर्यटक भिसामा आएका उनीहरु निजी घर भाडामा लिने तथा अपार्टमेन्टमा बसेर अवैध धन्दामा संलग्न हुने गरेको सूचनाको आधारमा उनीहरुलाई नियन्त्रणमा लिइएको प्रहरीले जनाएको छ । नियन्त्रणमा लिइएका चिनियाँहरुबाट ठूलो संख्यामा ल्यापटप र मोबाइल बरामद गरिएको र उनीहरुका गतिविधिको अनुसन्धान भइरहेको पनि प्रहरीले जनाएको छ । पछिल्लो समय बैंक तथा वित्तीय संस्था ‘ह्याकिङ’मा चिनियाँहरुको संलग्नता बढ्दै गएको छ ।