अखबार नेपाल ट्रेन्डिङ

काठमाडौं : प्रतिनिधिसभाका नयाँ सभामुख चयनको प्रक्रिया पुस ११ गतेदेखि सुरु हुने भएको छ । आज संघीय संसद भवन नयाँबानेश्वरमा बसेको कार्य व्यवस्था परामर्श समिति बैठकले हिउँदे अधिवेशनको दोस्रो बैठकबाट नयाँ सभामुख चयनको प्रक्रिया सुरु गर्ने निर्णय गरेको हो ।

संसदको हिउँदे अधिवेशन सुरु गर्नुअघि आज दिउँसो १ बजे उपसभामुख शिवमाया तुम्बाहाङ्फेले कार्यव्यवस्था बैठक बोलाएकी हुन् । सभामुखले बोलाउने गरेको उक्त बैठक उपसभामुख तुम्बाहाङ्फेले सभामुखकै हैसियतमा बोलाएकी हुन् । प्रतिनिधीसभा बैठकको अध्यक्षता पनि उनले नै गर्ने भएकी छिन् । सभामुख नभएका अवस्थामा बैठकको अध्यक्षता उपसभामुखले गर्ने संविधानमा व्यवस्था भएपनि प्रतिनिधिसभा नियमावलीमा बैठकको प्रारम्भ र स्थगन सभामुखले गर्ने प्रावधानले यसअघि अन्योल सिर्जना गरेको थियो ।

आजको बैठकमा राष्ट्रपति विद्यादेवी भण्डारीले संघीय संसदको हिउँदे अधिवेशन आह्वान गरेको पत्र पढेर सुनाउने, पूर्व सांसदको निधनमा शोक प्रस्ताव पारितगर्नेलगायत कार्यसूची तय भएको छ । उपसभामुख तुम्बाहाङफेले पुस ११ गते बस्ने हिउँदे अधिवेशनको दोस्रो बैठक अघि नै राजीनामा दिनुहुनेछ । जेष्ठ सदस्यले बैठक सञ्चालन गर्दै सभामुख चयनको प्रक्रिया अगाडि बढाउनेछन् । सभामुखमा नेकपा नेता सुवास नेम्वाङ, अग्नि सापकोटासँगै उपसभामुख तुम्बाहाङफेको नाम चर्चामा छ ।