अखबार नेपाल ट्रेन्डिङ

काठमाडौं: शिक्षकहरूले १६ औँ दिन पनि सडक आन्दोलनलाई निरन्तरता दिने भएका छन् । विद्यालय शिक्षा ऐन जारी नभएसम्म सडक नछोड्ने अडानमा रहेका शिक्षकहरुले बिहीबार पनि माइतीघर-बानेश्वर क्षेत्रमा विरोध प्रदर्शन गर्ने भएका छन् ।

दिउँसो १२ बजे माइतीघर मण्डालामा भेला भएर प्रदर्शन गरिने नेपाल शिक्षक महासंघले जनाएको छ । महासंघका अध्यक्ष लक्ष्मीकिशोर सुवेदीले ढिलोचाँडो आफूहरुसँग भएको सहमति कार्यान्वयनको विकल्प सरकारसँग नभएको भन्दै आन्दोलन जारी रहने बताए । आन्दोलनलाई मर्यादित र अनुशासित बनाउँदै तोकिएको अवधि दिउँसो १२ देखि ३ बजेसम्म आन्दोलन स्थलमै रहन शिक्षकहरूलाई आग्रह गरेका छन् । सरकारले माग पूरा गर्ने प्रक्रिया सुरु गरिसकेकाले आन्दोलन स्थगित गरी विद्यालयमा फर्कन आग्रह गरे पनि शिक्षकहरू विश्वस्त हुन सकेका छैनन् ।

मन्त्रिपरिषदले वैशाख १२ गते संसद अधिवेशन आह्वानको सिफारिस गर्दै विद्यालय शिक्षा विधेयक छिटो पारित गर्नका लागि आवश्यक समन्वय र सहजीकरण गर्ने निर्णय गरेको थियो । शिक्षा मन्त्रालयले पनि बुधबार प्रेस विज्ञप्ति जारी गर्दै मन्त्रिपरिषद्को निर्णय प्रभावकारी कार्यान्वयन गर्ने प्रतिबद्धता व्यक्त गर्दै प्रदर्शनका कार्यक्रम रोकेर काममा फर्कन शिक्षकहरूलाई आग्रह गरेको छ ।

शिक्षकहरुकको आन्दोलनले देशभर विद्यार्थी भर्ना अभियान र एसईईको उत्तरपुस्तिका परीक्षण रोकिएको छ भने आगामी वैशाख ११ गतेदेखि सुरु हुने कक्षा १२ को राष्ट्रिय परीक्षा समेत प्रभावित हुने भएको छ ।  शिक्षकको यो रवैयाले अभिभावक भने मारमा परेका छन् । उनीहरु आफ्ना छोराछोरीको भविष्य अब के हुने भन्ने चिन्तामा छन् ।