अखबार नेपाल ट्रेन्डिङ

काठमाडौं: नेपाली कांग्रेसबाट मुक्ताकुमारी यादव र सत्तारुढ सात दलीय गठबन्धनका तर्फबाट राष्ट्रिय स्वतन्त्र पार्टी (रास्वपा) की इन्दिरा राना मगरले उपसभामुख पदमा उम्मेदवारी दर्ता गराएका छन् ।

यादवले पार्टीका सहमहामन्त्रीसमेत रहेका प्रतिनिधिसभा सदस्य बद्री पाण्डेको प्रस्तावमा उपसभामुखका लागि उम्मेदवारी दर्ता गरेकी हुन् ।

यादवको उम्मेदवारीमा प्रतिनिधिसभा सदस्यद्वय नेकपा एकीकृत समाजवादीका मेटमणि चौधरी र लोकतान्त्रिक समाजवादी पार्टी (लोसापा) का सवेन्द्रनाथ शुक्ल समर्थक बसेका छन् ।

सात दलीय गठबन्धनका तर्फबाट राष्ट्रिय स्वतन्त्र पार्टी (रास्वपा)की इन्दिरा राना मगरलाई रास्वपाकी सांसद सोविता गौतम प्रस्तावक र एमाले सांसद कृष्णगोपाल श्रेष्ठ, नारायणी शर्मा र राजेन्द्रप्रसाद लिङ्देनको समर्थनमा उपसभामुखमा उम्मेदवारी दर्ता गराएकी छिन् ।

उपसभामुख चयनका लागि शनिबार निर्वाचन हुने भएको छ । बिहीबार भएको निर्वाचनमा नेकपा एमालेका तर्फबाट प्रतिनिधिसभा सदस्य रहेका देवराज घिमिरे कांग्रेस सांसद ईश्वरी न्यौपानेलाई पराजित गर्दै सभामुखमा निर्वाचित भएका थिए ।