अखबार नेपाल ट्रेन्डिङ

काठमाडौं: आगामी मंसिर ४ गते प्रतिनिधिसभा र प्रदेशसभाको निर्वाचन हुँदैछ । निर्वाचनका लागि सत्ता गठबन्धनमा रहेका दलहरुले गठबन्धनमै निर्वाचन लड्ने तयारी गरेका छन् ।

त्यसका लागि एउटा कार्यदल निर्माण गरी सिट बाँडफाँड कार्यदल निर्माण गरेका छन् । जुन कार्यदलको बैठक आज पनि बस्ने भएको छ ।

सिट बाँडफाँडको लागि बनेको कार्यदलले सिट बाँडफाँडको मोडालिटीबारे छलफल गरेको छ । यसमा नेपाली कांग्रेसले १६५ प्रतिनिधिसभाको क्षेत्रमध्ये १०० सिट आफूहरुलाई हुनुपर्ने माग गरेको छ  ।

अन्य दलले यसमा केही बोलेको छैन । यसरी आफूलाई बहुमत सिट चाहिएको दाबी कांग्रेसले गरेपछि यसमा अन्य दलहरु रुष्ट हुन थालेका छन् । उनीहरुले सम्मानजनक सिट दिन माग गरिरहेका छन्  ।

तर, यसमा कांग्रेसले नमान्ने अवस्था देखिएको छ  । कांग्रेसले १०० सिट लिए बाँकी रहेको ६५ सिटमा अन्य चार दललाई समेट्नुपर्ने हुन्छ । यसो गर्दा नेकपा माओवादी केन्द्रले ४० देखि ४५ सिट दाबी गर्ने अवस्था रहेको छ  ।

यस्तै नेकपा एकीकृत समाजवादी केन्द्रले पनि आफूलाई २० देखि २५ सिट दाबी गरेको छ  ।

जनता समाजवादी पार्टीले पनि सोही अनुरुपको सिट दाबी गर्ने देखिन्छ । राष्ट्रिय जनमोर्चालाई पनि भाग पुर्याउनुपर्ने अवस्था छ  ।

यस्तो अवस्थामा कांग्रेसलाई बहुमत सिट दिने कुरामा गठबन्धनमा रहेका दलहरु ईच्छुक देखिदैनन् । यो अवस्थामा गठबन्धन नै भत्किन सक्ने समेत देखिन्छ  ।

कार्यदललाई जसरी पनि सिट बाँडफाँडको काम टुङ्ग्याउनुपर्ने समस्या आईपरेको छ । हिजो  बालुवाटारमा बसेको सत्ता गठबन्धन बैठकले पनि कार्यदललाई तोकिएको जिम्मेवारी छिटो पूरा गर्न निर्देशन दिएको थियो ।

भदौ पहिलो साताभित्र सिट बाँडफाँट टुंग्याउने गरी काम गर्न कार्यदललाई आग्रह गरिएको छ ।

कार्यदल बैठकमा सत्ता गठबन्धनका शीर्ष नेतालाई नहराउने गरी सिट बाँडफाँट मिलाउनेबारे पनि छलफल भएको थियो । अहिले कार्यदललाई यो काम सकाउनुपर्ने बाध्यता त छदैछ अर्कातिर गठबन्धन भत्किन नदिनका लागि उचित निकास दिनुपर्ने अवस्था समेत रहेको छ ।

कार्यदलले कसरी यो कामलाई फत्ते पार्ने हुन त्यो चाही हेर्न बाँकी रहेको छ ।