भर्चुअल माध्यमबाट कुर्था-जयनगर रेल उद्घाटन शनिबार गरिदै
वि.सं.२०७८ चैत १५ मंगलवार १७:११
काठमाडौं: प्रधानमन्त्री शेरबहादुर देउवा र भारतीय प्रधानमन्त्री नरेन्द्र मोदीले भर्चुअल माध्यमबाट कुर्था-जयनगर क्षेत्रमा सञ्चालन हुने रेलको शनिबार उद्घाटन हुने भएको छ ।
शनिबार नेपालका प्रधानमन्त्री देउवा र भारतका प्रधानमन्त्री मोदीले भर्चुअल माध्यमबाट रेलको उद्घाटनको बेला जनकपुरमा एक कार्यक्रम हुनेछ ।
जसमा भारतीय पक्षका प्रतिनिधि र भौतिक पूर्वाधार तथा यातायत मन्त्री रेणुकुमारी यादवको उपस्थिती हुने बताईएको छ ।
फागुन १ गतेदेखि जनकपुरधामको कुर्थादेखि भारतको जयनगरसम्म दिनको एक पटक रेल बिना यात्रु ‘ड्राइ रन’ भइरहेको छ ।
लामो समयदेखि नचलाई राखेको हुनाले दिनको एक पटक ‘ड्राइ रन’ गराइएको हो । नेपालका प्रधानमन्त्री देउवा र भारतीय प्रधानमन्त्री मोदीले सयुक्तरुपमा उद्घाटन गरेपछि यात्रुसहित नियमित रेल सञ्चालन गरिने छ ।
रेल सञ्चालनका लागि ६० जना कर्मचारीलाई भारतीय प्राविधिक र रेलका कर्मचारीले तालिम दिईएको छ । कुर्थादेखि जयनगरसम्म चल्ने रेल्वे सेवाको भाडासमेत तय भइसकेको छ ।
कुर्था–जयनगरसम्म सामान्यमा ७० रुपैयाँ भाडादर कायम गरिएको छ भने एअर कन्डिसन(एसी) सहितमा प्रतिव्यक्ति दुई सय रुपैयाँ भाडा निर्धारण गरिएको छ ।
उक्त रेलमा १ हजार २ सय देखि १ हजार ३ सय जनासम्म यात्रु बसेर र उभिएर गरी यात्रा गर्न सक्ने रेल विभागले जनाएको छ ।
वि.सं.२०७८ चैत १५ मंगलवार १७:११