अखबार नेपाल ट्रेन्डिङ

काठमाडौं: केन्द्रीय सदस्य चयनका लागि सहमति खोज्न साँझ ५ बजेसम्मका लागि नेकपा माओवादी केन्द्रको बन्दसत्र स्थगित भएको छ ।

सहमति खोज्नका लागि ५ बजेसम्मका लागि स्थगित भएको बन्दसत्र सहमति नजुटेमा निर्वाचन प्रकृया अगाडि बढ्ने छ ।

यसअघि आज बसेको स्थायी कमिटी बैठकले पनि समावेशी सहित क्लस्टरमा भूगोलसहित ८ प्रदेश लगायतबाट केन्द्रीय सदस्य छान्ने विषयमा छलफल भएको थियो ।

विधान अनुसार अब पार्टीको केन्द्रीय कमिटी ५० प्रतिशत खुल्ला र ५० प्रतिशत पूर्ण समानुपातिक गरी मिश्रित निर्वाचन प्रणालीका माध्यमबाट चुनिनेछ ।

केन्द्रीय कमिटी २ सय ९९ सदस्यीय हुनेछ । यसअघि केन्द्रीय कमिटीले १० प्रतिशत मनोनित गर्ने भनिएकोमा बढाएर १५ प्रतिशत पुर्‍याइएको छ ।

महाधिवेशनले केन्द्रीय कमिटी, केन्द्रीय कमिटीले पोलिट्व्यूरो, स्थायी कमिटी र पदाधिकारी चयन गर्नेछ । पोलिटव्यूरो, स्थायी कमिटी र पदाधिकारी समावेशी सिद्धान्तका आधारमा चयन हुनेछ ।

५० प्रतिशतको पूर्ण समानुपातिकमा दलित, मुस्लिम, थारु, मधेसी, आदिवासी जनजाति, खस आर्य, अपांगता, पिछडिएको क्षेत्र, महिला र युवाको क्लस्टर बनाइएको छ ।

केन्द्रीय कमिटीमा सबै क्लस्टर र खुल्लाबाट गरी ३५ प्रतिशत महिला र २० प्रतिशत ४० वर्ष मुनिका युवाको प्रतिनिधित्व हुनेछ ।