अखबार नेपाल ट्रेन्डिङ

पोखरा: ब्रिगेड ब्वाइज क्लबलाई १-० गोल अन्तरले हराउँदै मनाङ मर्स्याङ्दी क्लब सहिद स्मारक ‘ए’ डिभिजन लिग फुटबलको शीर्ष स्थानमा उक्लिएको छ ।

पोखरा रंगशालामा आज भएको मनाङलाई जित दिलाउन कप्तान अन्जन विष्टले निर्णायक गोल गरे ।

उनले पहिलो हाफको इन्जुरी समयमा गोल गरेका थिए । जितसँगै मनाङले एएएफसी कप छनोटको सम्भावना कायम गरेको छ ।

ब्रिगेड भने पेनाल्टीमा गोल गर्न नसक्दा पराजित भएको हो । ब्रिगेडका शिशिर लेखीले खेलको १७औं मिनेटमा पेनाल्टीमा गोल गर्न सकेनन् ।

जितसँगै मनाङ अंक तालिकाको शीर्षस्थानमा उक्लेको छ भने मछिन्द्र फुटबल क्लब दोस्रो स्थानमा झरेको छ ।

मनाङको १६ अंक पुगेको छ । मछिन्द्रको १४ अंक छ ।

एएफसी कप छनोटमा पुग्नका लागि मछिन्द्रले आइतबार हुने खेलमा नेपाल पुलिस क्लबलाई हराउनै पर्ने हुन्छ ।

मछिन्द्र पराजित भए वा बराबरीमा रोकिएको खण्डमा मनाङले एएफसी कपमा देशको प्रतिनिधित्व गर्नेछ ।

सातौं चरणको समाप्तीमा एएफसी क्लब लाइसेन्स प्राप्त क्लबमध्ये लिगको माथिल्लो स्थानमा रहने टोलीले एएफसी कप छनोट खेल्ने अखिल नेपाल फुटबल संघले यसअघि नै सार्वजनिक गरेको थियो ।