अखबार नेपाल ट्रेन्डिङ

काठमाडौं: नेकपा एमाले १०औं महाधिवेशन अन्तर्गत ३०१ केन्द्रीय कमिटीका पदाधिकारी र सदस्यमध्ये निर्विरोध हुन नसकेका पदमा राति नौ बजेदेखि एक बजेसम्म मतदान हुने भएको छ ।

निर्वाचन प्रक्रियासँगै सर्वसहमतिको प्रयास भइरहेका बेला निर्वाचन समितिले निर्वाचन कार्यक्रम संशोधन गर्दै मतदानको समय निर्धारण गरेको हो ।

निर्वाचन हुने भएपछि उम्मेदवारहरु मत माग्न व्यस्त बनेका छन् । मतदान हुने भएसँगै उम्मेदवारहरुले प्रचार प्रसारलाई तिव्रता दिइरहेका छन् ।

अध्यक्ष, उपाध्यक्ष र सचिवसहित केही केन्द्रीय सदस्यका पदमा निर्विरोध हुन सकेको छैन । अधिकांश क्लस्टरबाट निर्वाचित हुनेहरू निर्विरोध निर्वाचित भइसकेका छन् ।

आवश्यकताभन्दा बढी उम्मेदवारी दर्ता भएका पदमा सहमतिको प्रयास जारी राखिएका कारण निर्वाचन कार्यतालिकामा संशोधन गर्नु परेको निर्वाचन समितिले जनाएको छ ।

सौराहास्थित होटल सेभेन स्टार परिसरमा जारी महाधिवेशनमा सहमतिमा नेतृत्व चयन गर्ने निवर्तमान अध्यक्ष केपी शर्मा ओलीले प्रयास गरेपनि कतिपय पदमा उम्मेदवारी दर्ता भएपछि मतदान हुने भएको हो ।

मतदान हुनेभएसँगै उम्मेदवारहरुले मतदातालाई फोन, मेसेज र भेटेरै मत मागिरहेका छन् । एमाले महाधिवेशनमा प्रतिनिधिको संख्या २ हजार १ सय ७५ रहेको छ । उनीहरु नयाँ नेतृत्व चयनका लागि मतदानमा सहभागी हुने छन् ।

मतदान विद्युतीय माध्यमबाट हुने छ । त्यसका लागि मतदान बुथहरु बनाइएको छ । सयवटा मतदान मेसित तयारी अवस्थामा रहेको जनाइएको छ ।

एमालेमा पदाधिकारीका १४ पदका लागि १८ जना चुनावी प्रतिस्पर्धामा उत्रिएका छन् । अध्यक्षमा केपी शर्मा ओली र भीम रावल चुनावी मैदानमा छन् ।