अखबार नेपाल ट्रेन्डिङ

काठमाडौं: नेपाल राष्ट्र बैंकको कुल विस्तृत आय ३२ अर्ब ५५ करोड १५ लाख ३९ हजारमा झरेको छ । खुद सञ्चालन आम्दानीमा उच्च गिरावट आएको छ ।

अघिल्लो आर्थिक बर्षको तुलनामा गत आर्थिक बर्ष २०७७/७८ मा यस्तो आम्दानीमा २४.९६ प्रतिशतले गिरावट आएको छ ।

अघिल्लो वर्ष कुल विस्तृत आय १ खर्ब ९ अर्ब ४५ करोड २१ लाख ४० हजार रहेको थियो । यो ७२.६४ प्रतिशतको गिरावट हो ।

राष्ट्र बैंकको खुद सञ्चालन आम्दानी २४ अर्ब ७३ करोड रुपैयाँ भएको छ । खुद सञ्चालनमा आम्दानीमा खुद ब्याज आम्दानीको हिस्सा ८८.२३ प्रतिशत, विदेशी बिनिमय खरीद बिक्रीबाट हुने आम्दानीको हिस्सा ७.७ प्रतिशत र अन्य सञ्चालन आम्दानीको अंश ४.०७ प्रतिशत रहेको छ ।

खुद ब्याज आम्दानी नै २६.३७ प्रतिशतले घटैर २१ अर्ब ८२ करोड रुपैयाँमा खुम्चिएको छ । विदेशी बिनियमय खरीदबिक्रीबाट हुने आम्दानी भने ११.११ प्रतिशतले बढेर एक अर्ब ९० करोड ३८ लाख ४० हजार पुगेको छ ।

आर्थिक वर्ष २०७७/७८ को विदेशी विनिमय तथा अन्य सम्पत्ति पुनर्मूल्याङ्कन लाभ/हानि समायोजन अघिको खुद आय अघिल्लो वर्षको तुलनामा ३१.३९ प्रतिशतले घटेर १९ अर्ब ३५ करोड ६४ लाख ७० हजार कायम भएको छ ।

यस्तो खुद आय आर्थिक वर्ष २०७६/७७ मा २८ अर्ब २१ करोड १३ लाख ७७ हजार रहेको थियो ।

विदेशी विनिमय पुनर्मूल्याङ्कन लाभ ८ अर्ब १९ करोड २२ लाख ११ हजार र सुन तथा चाँदी पुनर्मूल्याङ्कन लाभ ३ अर्ब ६९ लाख २८ हजार समायोजनपछि खुद आय ३० अर्ब ५५ करोड ५६ लाख ९ हजार कायम भएको छ । गत वर्ष खुद आय १ खर्ब ७ अर्ब ९४ करोड ६१ लाख २४ हजार रहेको थियो ।