अखबार नेपाल ट्रेन्डिङ

काठमाडौं: प्रधानन्यायाधीश चोलेन्द्र शमशेर जबरा र अन्य न्यायाधीशहरुको विवाद चर्किरहेका बेला सर्वोच्चले मंगलबार पनि पेशी तोकेको छ ।

सर्वोच्च प्रशासनले मंगलबारका लागि ८ वटा एकल र संयुक्त इजलास तोकेको छ ।

सोमबारदेखि नै १४ न्यायाधीशहरुले इजलास बहिष्कार थालेकाले सुनुवाइ भने अनिश्चित भएको छ । सोमबार पनि सर्वोच्च प्रशासनले ७ वटा इजालस तोकेको थियो ।

तर प्रधानन्यायाधीशविरुद्ध उभिएका कुनै पनि न्यायाधीशहरु सुनुवाइका लागि इजलासमा पसेनन् ।

बरु जबराविरुद्ध रणनीति बनाउनमै उनीहरु केन्द्रित भए । वरिष्ठ न्यायाधीश दीपक कार्की, हरिकृष्ण कार्की र मीरा खड्कासहितका १४ न्यायाधीशले मंगलबार प्रधानन्यायाधीश जबरालाई भेटिरहेका छन् ।

उनीहरुले उक्त भेटका क्रममा जबरालाई पद त्यागेर निकास दिन दबाब दिने भएका छन् ।

प्रधानन्यायाधीशलाई भेट्न जानुअघि मंगलबार पनि उनीहरु छलफलमा जुटेका थिए । छलफलपछि उनीहरु जबराको च्याम्बरमा छिरेका छन् ।

मंगलबारै नेपाल बार एसोसियशन र सर्वोच्च अदालत बार एसोसियशनले जबरालाई भेटेर राजीनामा दिन आग्रह गर्ने भएका छन् ।