अखबार नेपाल ट्रेन्डिङ

काठमाडौः काठमाडौंमा थप ५ सय ८३ जनामा कोरोनाभाइरस संक्रमण पुष्टि भएको छ ।

यसैबीच प्रधानमन्त्रीका निजी चिकित्सक एवं त्रिभुवन विश्वविद्यालय चिकित्साशास्त्र अध्ययन संस्थान (आईओएम)की डिन डा. दिव्या सिंह शाहलाई पनि कोरोना भाइरस संक्रमण पुष्टि भएको छ ।

कोरोनासँग मिल्दोजुल्दो लक्षण देखिएपछि उनले पीसीआर टेष्टका लागि स्वाब दिएकी थिइन् । शनिबार पोजेटिभ रिपोर्ट आएको र होम आइसोलेसनमा बसेको उनले बताइन् ।

काठमाडौंको संक्रमित मध्ये महिला १ सय ९९ र पुरुष ३ सय ८४ जना रहेका छन् । यस्तै भक्तपुरमा ६३ र ललितपुरमा ७८ जनामा संक्रमण पुष्टि भएको छ ।

स्वास्थ्य मन्त्रालयका अनुसार उपत्यकाका तीनै जिल्ला काठमाडौं, ललितपुर र भक्तपुरमा गरी जम्मा ७ सय २४ जनामा संक्रमण पुष्टि भएको छ ।

देशभर भने १ हजार २ सय ७ जना कोरोनाभाइरस संक्रमित थपिएका छन् । शनिबारको नियमित प्रेस ब्रिफिङमा स्वास्थ्य मन्त्रालयका प्रवक्ता डा जागेश्वर गौतमले यससँगै देशभर कोरोना संक्रमितको कुल संख्या ७१ हजार ८२१ पुगेको जानकारी दिए ।

उनका अनुसार आज देशभर सक्रिय संक्रमितको संख्या १८ हजार ३ सय ४१ जना रहेको छ । जसमा संस्थागत आइसोलेशनमा ७ हजार ८ सय ३३ र होम आइसोलेशनमा १० हजार ५ सय ८ जना रहेका छन् ।