अखबार नेपाल ट्रेन्डिङ

काठमाडौं: नेपाल र भारत दुई देशबीच लामो समयपछि सोमबार कूटनीतिक तहमा वार्ता हुने भएको छ ।

सोमबार जोयन्ट ओभरसाइड मेकानिजमको बैठक हुने परराष्ट्र प्रवक्ता भरतराज पौडेलले जानकारी दिए । बैठकमा नेपाली प्रतिनिधिमण्डलको नेतृत्व परराष्ट्र सचिब शंकरदास वैरागीले र भारतीय प्रतिनिधिमण्डलको नेतृत्व काठमाडौंस्थित भारतीय राजदूत विनय मोहन क्वात्राले गर्नेछन् ।

जोयन्ट ओभरसाइड मेकानिज्म २०१६ मा बनेको संयन्त्र हो । भारतीय लगानीका विकास आयोजनाबारे समीक्षा हुने यो संयन्त्रको बैठक हरेक वर्ष हुने गर्छ । तर, यो पटक भने यो बैठक कोरोना महामारी र नक्सा मतभेदका कारण ढिलाई भएको हो ।

नेपालले गत वैशाखमा कालापानी, लिम्पियाधुरा र लिपुलेकसहितको नक्सा जारी गरेपछि भारतले त्यसको विरोध गरेको थियो । नेपालले नक्सा जारी गरेपछि भारतले वार्ताको वातरण विथोलिएको भन्दै वार्तालाई महत्व दिएको थिएन ।