अखबार नेपाल ट्रेन्डिङ

काठमाडौं: संस्कृति, पर्यटन तथा नागरिक उड्डयन मन्त्रालयद्वारा गठित कार्यदलले पर्यटकीयस्थल ककनी बृहत्तर पर्यटन विकासका लागि स्थलगत भ्रमण गर्दै सरोकारवालाहरुसँग छलफल गरेको छ ।

मन्त्रालयका सहसचिव कमलप्रसाद भट्टराईको संयोजकत्वमा रहेको कार्यदलले पर्यटकीय क्षेत्र विकासका अवधारणा सहित गुरुयोजना बनाउनका लागि भन्दै भ्रमण र छलफल गरेको हो । छलफलमा तारागाउँ होटेल अनि स्काउटमा भएको छलफलमा पूर्वमन्त्री संघीय सांसद हितबहादुर तामाङ, संघीय सांसद नारायणप्रसाद खतिवडा, वाग्मती प्रदेश सांसद बद्री मैनाली, ककनी गाउँपालिका अध्यक्ष मानबहादुर लामा, पर्यटन मन्त्रालयका सहसचिवहरू, वडाध्यक्ष लगायत स्थानीयहरुको उपस्थिति थियो ।

मन्त्रालयले बनाएको कार्यदलको संयोजक मन्त्रालयको सहसचिव कमलप्रसाद भट्टराई र सदस्यहरु पर्यटन बिभागका महानिर्देशक डुण्डुराज घिमिरे, नेपाल पर्यटन बोर्डका प्रमुख कार्यकारी अधिकृत डा. धनन्जय रेग्मी र तारागाउँ बिकास समितिका अध्यक्ष प्रल्लाद न्यौपाने रहेका छन् ।

कार्यदलले प्राप्त कार्यादेश अनुसार काठमाडौंबाट नजिक रहेको, पर्यटकीय क्षेत्रको बिकासको लागि अति सम्भावनायुक्त र सुन्दर तथा रमणीय स्थल नुवाकोट जिल्लाको ककनीस्थित तारा गाउँ बिकास समिति, नेपाल पर्वतारोहण प्रतिष्ठान र नेपाल पर्वतारोहण संघ लगायतका विभिन्न संघ संस्थाले उपयोग गरिरहेका जग्गाहरुमा पर्यटन प्रवर्द्धनका लागि सुविधा सम्पन्न होटल, अन्तर्राष्ट्रियस्तरको सम्मेलन केन्द्र, पर्वतारोहण प्रशिक्षण केन्द्र, स्की खेलका पूर्वाधार, मनोरञ्जन पार्क, क्यासिनो जोन, माउन्टेन एकेडेमी, स्पोर्ट्स एकेडेमी लगायतका कार्यक्रमहरुका लागि आवश्यक पर्ने एकीकृत गुरुयोजनासँग सम्बन्धित प्रतिबेदन तयार गरि १५ दिन भित्र मन्त्रालयमा पेश गर्नुपर्नेछ ।