अखबार नेपाल ट्रेन्डिङ

काठमाडौं: ललितपुरको खोकनामा धान रोपाइँ गर्न गएका किसान र प्रहरीबीच झडप भएको छ । झडपका क्रममा प्रहरीले केही सेल अश्रुग्याँस समेत हानेको छ ।

काठमाडौं-तराई द्रुतमार्ग, बाहिरी चक्रपथ र मातातीर्थ-भक्तपुर १३२ केभी प्रसारणलाइन खोकना हुँदै बनाउने तयारीका साथ पछिल्लो समय अधिग्रहणका लागि सूचना निकालेको जमिनमा खनजोत गर्न नदिएपछि स्थानीयले विकासका नाममा जग्गा जमिन र पुर्ख्यौली थातथलो कब्जा गरेको र सांस्कृतिक धरोहरमाथि अतिक्रमण गरेको भन्दै स्थानीयबासीले विरोध गर्दै आएका छन् ।

अधिग्रहणका लागि सूचना निकालेको जमिनमा खनजोत गर्न नदिएपछि स्थानीयहरुले खड्का फाँटमा ट्याक्टर लगाएर खानजोत गर्दै संयुक्त रोपाइँ कार्यक्रम राखेका थिए । स्थानीयलाई प्रहरीले रोक्न खोजेपछि विहानैबाट उक्त क्षेत्रमा तनाव बढेको थियो । स्थिति नियन्त्रणमा लिन थप टोली बोलाएर प्रहरी अगाडि बढ्ने क्रममा स्थानीय र प्रहरीबीच झडप भएको हो । स्थानीयले ढुंगामुढा गर्दा केही प्रहरी घाइते भएका छन् भने भिडलाई तितरवितर बनाउन प्रहरीले अश्रुग्यास समेत प्रहार गरेको थियो ।

खोकनाजस्तो ऐतिहासिक, सांस्कृति र पुरतात्विक महत्व बोकेको नगरलालाई ध्वस्त पारेर यहाँका किसानको जमिन हडप्ने सरकारी नीतिको विरुद्ध आन्दोलन जारी राखिने सम्पदा तथा संस्कृति बचाउ अभियानका अभियान्ता गणपतिलाल श्रेष्ठले बताए ।