अखबार नेपाल ट्रेन्डिङ

काठमाडौं: भरतपुर महानगरपालिकामा मेयरकी उम्मेदवार रेनु दाहाल विजयी भएकी छन् । उपमेयरमा कांग्रेसका चित्रसेन अधिकारी विजयी भएका छन् ।

रेनुले नेकपा एमालेका विजय सुवेदीलाइ साढे १२ हजार मतान्तरले पराजित गरेकी हुन् । रेनुले ५२ हजार ३० मत ल्याइन् । विजयले ३९ हजार ५ सय ८१ मत पाए । रेनु गठबन्धनबाट साझा उम्मेदवार थिइन् । विजय एमाले-राप्रपाबीचको गठबन्धनका उम्मेदवार थिए ।

रेनु भरतपुर महानगरको निवर्तमान प्रमुखसमेत हुन् । २०७४ मा भएको निर्वाचनमा उनले एमालेकै देवी ज्ञवालीलाई जम्मा २ सय ३ मतान्तरले मात्रै हराएकी थिइन् ।

दोस्रोपटकमा भने रेनु १२ हजार बढीको फराकिलो मतान्तर राख्न सफल भइन् । रेनुका बागी उम्मेदवार जगन्नाथ पौडेलले १४ हजार ७ सय २८ मत ल्याए ।

यस्तै उपप्रमुखमा पनि गठबन्धनबाटै नेपाली कांग्रेसका चित्रसेन अधिकारी विजयी भएका छन् ।

अधिकारीले २२ हजार ४ सयको फराकिलो अन्तरले राप्रपाकी हिमला गुरुङलाई पराजित गरेका हुन् । अधिकारीले ५२ हजार ८ सय ३ मत ल्याउदा गुरुङले ३० हजार ६ सय १२ मत पाइन् ।