रामेछापको शैलुङ्ग क्षेत्रमा पर्यटकको चहलपहल शुरु
वि.सं.२०७७ मंसिर ३० मंगलवार २१:५४
रामेछाप : रामेछापको पर्यटकिय स्थल शैलुङ्ग क्षेत्रमा अहिले पर्यटकको चहलपहल शुरु भएको छ ।
सूर्योदयको मनोरम दृश्यावलोकन तथा वरिपरिका हिमश्रृखलालाई नजिकैबाट नियाल्नका लागि प्रख्याल शैलुङ्गको अन्य मनोरम दृश्यावलोकनका लागि समेत आन्तरीक तथा बाह्य पर्यटकको घुँइचो लाग्न थालेको हो ।
शैलुङ्गको सय थुम्का, सूर्योदय अवलोकन, प्रसिद्ध पर्यटकीय केन्द्र, प्रथम साङ्गे म्हार्मोचे, पाँचौ पद्म सम्भव र सातौ गौतम बुद्धले तपस्या गरेको पवित्र भूमीले परिचित शैलुङ्गमा यतिवेला पर्यटकको घुइचो लागेको हो ।
गत बर्षको शैलुङ्ग महोत्सवपछि यस क्षेत्रमा भ्रमण गर्ने आन्तरीक तथा बाह्य पर्यटकको संख्या ह्वात्तै बढेको छ ।शैलुङ्गमा एक सय भन्दा बढी प्राकृतिक चुचुरा र थुम्काहरु मुख्य आकर्षकको रुपमा रहेका छ ।
नेपालको उत्तरी क्षेत्रमा रहेका हिमालको अवलोकन, रमणीय हिमश्रृखलाहरुको अवलोकन संग संगै यहाँको अन्य मनोरम दृश्यावलोकनका लागि विभिन्न जिल्लाबाट पर्यटकहरु आउने गरेको दोरम्बा गाउँपालिकाकी उपाध्यक्ष कृषला घिसिङ्गले बताउनु भयो ।
शैलुङ्ग पुग्न सिन्धुपाल्चोकको मुडे हुदै ढुंगे खोला खर्क सम्म तथा मन्थली, खिम्ती, फुलासी दोरम्बा हुंदै शैलुङ्ग सम्म र अर्को पदमार्ग मन्थली, खाँडादेवी हुंदै शैलुङ्गसम्मको सडक मार्ग मार्फत पर्यटकहरु यस क्षेत्रमा आउने गरेका छन् ।
पर्यटकीय मात्र नभएर धार्मीक दृष्टिकोणले समेत महत्वपूर्ण मानिएको शैलुङ्ग क्षेत्रमा अहिले नेपालका आन्तरीक पर्यटक मात्र नभएर भारत तथा अन्य देशबाट पनि पर्यटकहरु आउने गरेका छन् ।
रामेछापको शैलुङ्ग क्षेत्रमा अहिले दैनिक जसो ३ सय भन्दा बढी पर्यटकहरु आउने गरेका छन् । जंगलबाट निकै माथि उचाइमा रहेको सो स्थानमा यस भन्दा अगाडि जिल्ला भित्रकै केहि व्यक्तिहरु मात्र घुमफिरका लागि पुग्ने गरेका भएपनि अहिले भने अन्य जिल्लाबाट पनि पर्यटकहरु आउन थालेका छन् ।
करिव ३ हजार १ सय मिटर भन्दा अग्लो उक्त स्थानमा केहि दिन यतादेखी पर्यटकको घुइचो लाग्न थालेको हो । शैलुङ्गको पर्यटन प्रर्वधनका लागि जिल्लाका सवैजना लाग्नु पर्ने उक्त क्षेत्रमा पुग्नु भएका जिल्ला समन्वय समिति रामेछापका उपप्रमुख दिपा पाख्रीनले बताउनु भयो ।
वि.सं.२०७७ मंसिर ३० मंगलवार २१:५४